occitanparis.com

Vida Vidanta - Creacion 2017 - Teatre occitan - La Rampa TIO

TIOLo companhiá de teatre La Rampa TIO presenta ongan (2017) un novèl espectacle : Vida Vidanta. Los tèxtes son de Joan Claudi Forêt.

L'ambicion del projècte es d'explorar « l’enòrma normalitat dels òmes e de las femnas que sèm », lo tot dins un encaminament teatral contemporanèu.

La companhiá prenguèt contact amb Joan Claudi Forêt, universitari, escrivan, emai apassionat de teatre e d’escritura teatrala. L'encontra capitèt e nos dona uèi Vida Vidanta o la vida de cada jorn.

Aquesta creacion, segon la presentacion que ne fa la companhiá, mòstra de scènas de vida que los òmes e las femnas i son confrontats, que sián joves, estudiants, adultes : interrogacions sus l’èsser, l’identitat, l’amor, la relacion a se, la relacion als autres, dins una societat que vanega, presa entre patrimòni e modernitat, entre caricatura e autenticitat.

Vida vidanta es un cabaret de situacions concrètas, contemporanèas, crudèlas de còps, comicas d’autres còps. L’umor, l’absurde, l’emocion assasonan de sequéncias, fòrça realistas. L'espectacle s'organiza al torn de peçòtas coma : Carta d’identitat, Mond invèrs, L’amor, çò que ne sòbra, Vidassa Vidanta...

Distribucion :

• Jòc : Viviana Allocco, Gilles Buonomo, Bruno Cecillon, Gaëlle Levêque
• Mesa en scèna : Jean Louis Roqueplan
• Visual : Fabrice Favel