jornada-castanLo 5 de mai de 2017 al CIRDÒC se debanava una jornada d'estudi sus Félix Castan. Aquí çai jos la presentacion e lo programa.

Los ensenhaires-cercaires del departament d'occitan de l'Universitat Paul-Valéry (Montpelhièr) e del laboratòri Recherche en domaine occitan (RedOC-LLACS) an consacrat dempuèi d'annadas de collòquis o de jornadas d'estudis a un fum d'autors màgers de la renaissença d'òc dempuèi lo sègle XIX, que s'agisca de Frederic Mistral, Max Roqueta, Leon Còrdas, Loisa Paulin, Sergí Bec, d'autres encara, en particulièr dins lo quadre d'un projècte de cèrca sus la poesia d'òc de 1930 a 1960. En parallèl, an iniciat lo projècte Vidas - Per un diccionari biografic de la renaissença d'òc dels sègles XIX-XXI en partenariat amb lo CIRDÒC.

Es dins lo drech fial d'aqueles projèctes, al caireforc de l'istòria dels moviments socials e culturals, de l'istòria de las idèas e dels estudis literaris qu'es organizada aquela jornada d'estudi a l'entorn de l'òbra de Felix Castan, poèta, teorician, militant, actor de la valorizacion del teatre e de l'art occitan, que foguèt un dels pilars de l'Institut d'estudis occitans (IEO).

Lo ròtle de Castan dins la vida culturala occitana, lo debat d'idèas, la pensada occitana sus mai de mièg-sègle foguèt considerable e contunha de viure dins sas influéncias nombrosas sus la pensada, l'accion e la creacion occitana d'uèi.

Programa

  • 9h00 - Acuèlh
  • 10h00 - Roland Garrigues : Felix Castan a Montalban
  • 10h30 - Hervé Terral : Castan "Eiritièr" de Perbosc
  • 11h00 - Maria-Joana Verny : de la correspondéncia Castan / Lafont : 1943-1964. Idèas e debats
  • 11h30 - 12h30 : presentacion e visita del CIRDÒC
  • 14h00 - Felip Gardy : Felix Castan e la literatura occitana : lo metòde "generacional" coma otis d'analisi e arma del combat intellectual occitanista.
  • 14h30 - Cécile Noilhan : Felix Castan e la Seconda Guèrra mondiala : Resisténcia per las letras, Resisténcia per las armas.
  • 15h00 - Clara Torreilles : Letras de Castan a Enric Espieut sus la direccion de "Messatges"
  • 15h30 - Jean-Paul Damaggio: Marxismes e occitanismes segon Felix Castan.
  • 16h00 - Silvan Chabaud : Castan blues : la pensada de Castan al còr del reviscòl musical occitan de las annadas 90 (Fabulous Trobadors e Massilia Sound System).
  • 16h30 - François Pic : Ensagi de bibliografia de Felix Castan (1920-2001).
  • 17h00 - Las conclusions de la jornada seràn tiradas per Felip Martel.
 

libres


Los ensenhaments de M. Lapluma - Andrieu Lagarda

Los ensenhaments de M. Lapluma de Andrieu Lagarda (Letras d'òc, 2017, 15 x 21 cm, 160 paginas, 20 €, ISBN : 978-2-916718-76-7).

Aqueste libre recampa una garba de cronicas d'Andrieu Lagarda dedicadas a la lenga occitana, paregudas pel primièr còp dins la revista Lo Gai Saber.

D'un biais risolièr e umoristic, l'autor balha conselhs e ensenhaments a totes los que vòlon escriure en lenga occitana.

Lo sagèl del secret - Gui Vialà

Lo sagèl del secret de Gui Vialà (IEO, colleccion Crimis, 1995, 75 paginas, 6 €).

Après Par o impar paregut en 1984 Gui Vialà publicava un autra roman policièr Lo sagèl del secret dins la jova collecion Crimis de l'IEO.

Extrach : « ... Agachèt un moment aquel bolegadís puèi profèitet d’un embolh de las autòs per traversar. Çò que lo tirava de l’autre costat èra lo magasin de monsur Marc.

« Aquí se vendiá de timbres de colleccion. Darrièr la vitra èran presentadas de pochetas amb de timbres de gaireben totes los païses : polits images de bèstias, de flors, de monuments, tot aquò plen de colors. I aviá tanben de cartas e d’envolòpas que portavan un sagèl que se disiá del "primièr jorn" d’emission. Res de rar. Se met pas jol nas de tot lo monde, çò que donariá benlèu de marridas idèas a de colleccionaires envejoses. Cada jorn l’òme s’arrestava davant aquelas vinhetas. Semblava prene plaser de las véser, puèi sens agachar las autras botigas e, totjorn dapàs, tornèt trobar la carrièra del Portal Nòu. Èra gaireben nuèit quand dobriguèt la pòrta de l’ostal. »

 

cultura, opinions...


Carcassona - Espectacle del grop ÒC : Lumina

Del 8 al 17 d'agost de 2017, cada ser a 21h30, lo Grop ÒC presenta dins lo teatre Jean Deschamps de la Ciutat de Carcassona l'espectacle son e lum Lumina.

Al programa : cavalièrs, bruèissas, dragons, unicòrns e autres animals fantastics, projeccions e efèctes especials, lo tot al servici d'una istòria que vos fa cabussar dins un raconte ligat a l'imaginari medieval dins un luòc unic al mond.

Pesenàs - Totèms e gigants

Los 1er e 2 de julhet de 2017 l'associacion Les Amis du Poulain basada a Pesenàs organizava en partenariat amb la Vila de Pesenàs, lo CIRDÒC e lo CFPCI (Centre Francés del Patrimòni Cultural Immaterial) la ronda dels totèms e gigants europèus.

Un eveniment màger pels totèms e gigants d'Occitània e de pertot.

 

sciéncias e tecnicas


Novèla usina Latécoère a Tolosa

Lo dijòus 13 de julhet de 2017 la primièra pèira de la novèla usina Latécoère es estada pausada a Tolosa, al pargue d'activitat de Montredon.

Aquela usina, dicha del futur, es estada concebuda tre la debuta amb d'espleches numerics, aquò ne farà una usina zèro papièr. Demai, un còp acabada, la produccion serà completament automatizada (produccion 4.0). L'investiment s'amonta a 25 milions d'èuros.

París - Pollucion - Justícia

Clotilde Nonnez, ajudada per l'associacion Respire, debutèt lo dimècres 7 de junh de 2017, una accion en justícia contra l'Estat francés per carence fautive. Parisenca es malauta. En causa : la pollucion atmosferica permanenta a París.

Après son arrivada dins los ans ochante venguèt asmatica e sofrís al quotidian dempuèi trente ans de multiplas afeccions que los mètges atribuïsson directament a la pollucion.

 

politica, economia...


Eleccions legislativas de 2017 - Partit Occitan

partit-occitan-legislatives-2017Lo Partit Occitan presenta sos candidats e los candidats que sosten per las eleccions legislativas de 2017.

Aquí çai jos la lista amb lo nom dels relevaires, la circonscripcion e lo departament.

Eleccions legislativas de 2017 lo PNO comunica

pno-legislatives-2017Comunicat de premsa : Lo Partit de la Nacion Occitana presenta Jeròni Picas coma candidat a las eleccions legislativas del 11 e 18 de junh de 2017 dins la 8ena circonscripcion de Nauta Garona amb coma relevaira Dominique Darrozes.