duoc-2016-2017L'universitat de Tolosa-Joan Jaurés presenta lo programa 2016-2017 dels Dimècres Universitaris Occitans e Catalans (DUOC).

D’especialistas d’universitats francesas, europencas o americanas venon presentar lors darrièrs trabalhs sus la lenga l’istòria o la literatura occitanas e catalanas. Aqueles rescontres, dobèrts a totes, son organizats per l’Universitat Tolosa-Joan Jaurés (Seccion d’Occitan e Seccion de Catalan) amb lo sosten del CELO (Centre d’Estudi de la Literatura Occitana), del CREO-MP (Centre Regional per l’Ensenhament de l’Occitan en Miègjorn-Pirenèus) e de la Region.

Las conferéncias son en francés. La dintrada es liura.

*

Presentacion de Joan-Francés Courouau, responsable de la Seccion e de la Licéncia d’Occitan a l'univestitat Joan Jaurés.

L’annada universitària 2016-2017 marca una novèla partença per la recerca e l’ensenhament de l’Occitan dins nòstra universitat :

  • de novèls locals ultra-modèrnes, dignes dels melhors campusses europencs ;
  • un novèl bastiment batejat en sovenir dels trobadors tolosans del sègle XIV : lo Gai Saber ;
  • un novèl master, lo master Estudi e Valorizacion del patrimoine Occitan (master EVÒc), destinat a l’encòp a formar los quadres de la vida culturala occitan e a respondre als besonhs de la recerca fondamentala ;
  • l’organizacion del XIIn Congrès de l’Associacion internacionala d’estudis occitans (AIEO) que se debanarà as Albi del 10 al 15 de julh de 2017 amb de cercaires venguts del mond entièr.

Malgrat totas aquelas novetats, los DUOC, per lor novena annada d’existéncia, tornan en centre-vila.

La recerca qu’es menada sus la matièra occitana es pas sonque destinada qu’a far avançar la sciéncia e a profitar als estudiants. Deu tanben poder èstre facha accessibla a totas las e a totes los que, dins la societat, s’interèssan a la cultura occitana. Trabalhar sus de donadas complèxas significa pas que se pòscan pas presentar las resultas d’un biais simple e accessible a totes.

Es donc amb plaser que los DUOC tornan a l’Ostal d’Occitània après una annada passada dins los locals somptuoses de nòstre Ostal de la Recerca 2. Amb ongan en guest stars la femna de letras Maria Rouanet e lo lingüista Martin Maiden (Oxford).

Bona annada 2016-2017 !

*

  • Dimècres 19 d’octobre de 2016 - 18:30 - Ostal d’Occitània
    Joan-Ives CASANOVA (Universitat de Pau e dei País d’Ador)
    Frederic Mistral, l’ombra e lo resson
  • Dimècres 16 de novembre de 2016 - 18:30 - Ostal d’Occitània
    Michel BOURRET GUASTEVÍ (Universitat Paul Valéry, Montpelhièr)
    Menorca, una illa dins la veu de dos poetes : Pere Gomila (Geografies del Vent) et Joan Pons (L'illa dels arbres vençuts)
  • Dimècres 7 de decembre de 2016 - 18:30 - Ostal d’Occitània
    Maria ROUANET
    De femnas
  • Dimècres 1èr de febrièr de 2017 - 18:30 - Ostal d’Occitània
    Joan-Claudi BOUVIER (Ais-Marselha Universitat)
    La lenga d'òc coma se parla : l’Atlas lingüistic de Provença
  • Dimècres 15 de març de 2017 - 18:30 - Ostal d’Occitània
    Martin MAIDEN (University of Oxford)
    Un monument per las lengas romanicas : The Oxford Guide to the Romance Languages
  • Dimècres 19 d’abrial de 2017 - 18:30 - Ostal d’Occitània
    Dàvid FABIÉ (Universitat Tolosa – Joan Jaurés)
    Lums, poesia e païsans : Claudi Peyrot

Lòc : Ostal d’Occitània, 11 carrièra Malcosinat, 31000 Tolosa, M° Esquiròl

  

libres

Pèire Godolin - Edicion comentada e traduccion integrala

Sortiguèt en febrièr de 2009 a las edicions Privat lo libre Pèire Godolin. Oeuvres complètes. L'edicion es estada aprestada per Pèire Escudé.

Pèire Godolin – De las annadas 1600 fins 1649 ont morís, de la fin de l’umanisme fins a la començança de la provincializacion, Godolin ten de cantar e de representar l’imatge complèxe e multiple d’una societat tolosana, occitana, francesa, en mutacion complèta.

Lo cap del camin - Pèire Gogaud

Lo cap del camin es un pichon roman de Pèire Gogaud (Brenac 1912, Carcassonna 1988). Una òbra d'una granda sensibilitat. Sortiguèt en 1973.

L'autor manifèsta aquí una ambicion literaria plan rara en occitan, s'assaja per moment a distòrdre la narracion al servici de son subjècte e capita. Sap, amb intelligéncia, defugir trapèlas e luòcs comuns que son sempre a man de sorgir.

 
 

cultura, opinions...

Sus l'unitat de la lingüistica occitana

En julhet de 2017, a Albi dins l'encastre del XIIen congrès de l'AIEO, Patric Sauzet s'interrogava sus l’unitat de la lingüistica occitana.

Resumit (sorsa AIEO) : Los estudis occitans e particularament la lingüistica occitana son uèi pausats coma un camp especific. L’AIEO i a contribuït centralament e n’a promoguda la qualitat. Nòstra disciplina es pas per tant dispensada de s’interrogar sus son estatut.

Albi - Ligams entre l'occitan e lo catalan

Lo 17 de febrièr lo Centre Occitan Ròcaguda (COR) d'Albi organiza una vesprada dedicada als ligams entre la lenga occitana e la lenga catalana. Presentacion del COR :

Vos convidam lo dissabte 17 de febrièr a 5 oras del vèspre al Centre Occitan Ròcaguda per una descobèrta dels ligams lingüistics e culturals entre l’occitan e lo catalan.

 
 

sciéncias e tecnicas

Espaci - Falcon Heavy - An capitat !

Lo dimars 6 de febrièr de 2018 la societat SpaceX capitèt de mandar dins l'espaci la primièra fusada Falcon Heavy dempuèi son spacepòrt de Cap Canaveral en Florida.

Carga utila : lo cabriolet roge cerièisa d'Elon Musk, fondator de la societat. Direccion : Mars o la cencha d'asteroïdas del sistèma solar.

Aquela fusada es la mai poderosa mandada en orbit dempuèi las miticas Saturn del programa american Apollo e l'Energia russa.

Educacion - Lo projècte ERASMUS +

Foguèt a la davalada de 2016 que lo programa ERASMUS + « l'Educacion al Desvolopament Durable dins nòstras lengas » debutèt a l’iniciativa de las conselhièras pedagogicas d’occitan de l’Acadèmia de Montpelhièr.

Pilotat pel Centre interregional de desvolopament de l’occitan (CIRDÒC), lo projècte reünís 7 partenaris a travèrs 4 regions europèas (Occitània, Val d’Aran, Val d’Aosta e Piemont) dins las qualas 6 lengas son parladas : l’occitan, lo francoprovençal, lo catalan, lo francés, l’espanhòl e l’italian.

 
 

politica, economia...

Lemòtges - Signatura de la convencion per l'ensenhament de l'occitan

Es estada signada a Lemòtges lo 2 de febrièr de 2018 la convencion per lo desvolopament e l'estructuracion de l'ensenhament de l'occitan dins l'acadèmia.

Los signataris son : Daniel Auverlot, rector de l'acadèmia, Alain Rousset, president del conselh regional de Nòva Aquitània e Charline Claveau-Abbadie, presidenta de l'Ofici public de la lenga occitana.

Manifestacions del 3 febrièr de 2018

Genièr de 2018, lo Collectiu Occitan organizator de las manifestacions del 3 de febrièr de 2018 per demandar una preséncia mai importanta de la lenga occitana a la television, comunica :

La lenga e la cultura occitanas an un besonh imperatiu, absolut, dins lo mond tal coma es ara, d'aver accès als mèdias de massa e d'en primièr, d'una preséncia « normala » a la television publica.

Es un relai indispensable per tota l'accion educativa e culturala qu'es menada per las associacions.