Lo 1èr de julhet de 2020, en seguida de las eleccions municipalas en França lo Partit de la Nacion Occitana (PNO) comunicava.

*

RPS (Regions e Pòbles Solidaris) : un comunicat orientat e lacunari

Lo comunicat de premsa de RPS tocant la segonda votacion de las eleccions municipalas del dimenge 28 de junh es tras que susprenent per aqueles que conèisson pas lo dejós de las cartas.

Dins aqueste comunicat signat del sieu President Gustau Aliròl del Partit Occitan, las resultas d’Alsàcia, de Bretanha, de Corsega e de Mosela son mençonats. Per Occitània, sonque son citadas, doas comunas que los cònsols [màgers] sortents del Partit Occitan son estats re-elegits. Oblidats (volontàriament ?) las resultas municipalas d'Occitània-País Nòstre : 50 tièras labelizadas e d'elegits dins 25 comunas ! Es pas res.

Solide, Occitània-País Nòstre es pas sòcia de RPS, totun ne parlar pas es tot simplament far pròva de sectarisme.

Pel Partit de la Nacion Occitana es pas una suspresa. Ensagèrem tantes còps de rejonher RPS e cada còp nos truquèrem sul veto del Partit Occitan que pretend representar tot sol Occitània.

Lo Partit de la Nacion Occitana a subretot lo tòrt als uèlhs del president de RPS d’èsser nacionalista e independentista, çò que per el, que jura que per l'esquèrra ecologista occitana, es una tara.

Al mens podriá aver l’onestetat de travestir pas la situacion politica en Corsega ont i a pas de « regionalistas » mas d'autonomistas e d'independentistas e a pas besonh tanpauc d'emplegar de verguetas per parlar dels « nacionalistas » dins l’isla coma se preniá aqueste mot del cap dels dets.

Gustave Alirol a plan lo dreit d’èsser anti-nacionalista e anti-independentista mas a pas encara comprés qu'avèm un adversari comun : l’Estat françés. Dins sa volontat jamai desmentida d’OPA sul movement politic occitan amb la complicitat d’EELV, lo Partit Occitan pòrta un maissant còp al movement politic occitan e contribuís pas a l’emancipacion de la nòstra nacion occitana per la quala totes los militants occitans se deurian sarrar los coides.

Lo PNO (1èr de julh de 2020)

*

Lo comunicat de RPS que l'article i far allusions se pòt legir [aquí]