Al mes de junh de 2026 la Federacion dels Ensenhaires de Lenga e de Cultura d'Òc (FELCO) comuniquèt sus los resultats dels concorses del CAPES e de l'agregacion d'occitan.
Los redactors precisavan dins lor comunicacion que Myriam Baffie, Florian Ponty e Nelly Pujol avián capitat lo CAPES d’occitan-lenga d’òc e qu'Estela Harris e Rudy Rousset avián capitada l’agregacion.
An profechat del comunicat per felicitar los formators de las Universitats de Tolosa e Montpelhièr qu’an preparats los candidats. Rapelant que « los concorses son un aquesit relativament recent del trabalh collectiu, e que son totjorn menaçats : la mobilizacion collectiva, per lo biais de la FELCO e lo sosten de las organizacions sindicalas e dels elegits, es sempre necessària. Per l’agrèg 2026, mai que mai, a l’auton 2025, èra pas anonciada cap de dubertura de session. Calguèt una mobilizacion fòrta per forçar lo Ministèri a dubrir lo concors. »
L’agregacion d'occitan existís en França dempuèi 2018. Lo concors es estat creat oficialament per decrèt en març de 2017, jol ministèri de Najat Vallaud-Belkacem, dins l’encastre d’una novèla seccion titolada Agrégation de langues de France. Aquesta rubrica engloba divèrsas opcions (dont l’occitan, lo breton, lo còrs) e permet als ensenhaires d’aquelas disciplinas de beneficiar de las meteissas perspectivas professionalas que lors collègas dins d’autras lengas modèrnas.
La creacion del CAPES d'occitan-lenga d'òc data ela de la debuta de las annadas nonanta del sègle passat.
