Lo 10 d'octobre de 2020 se debanèt a Castèlnòu d’Arri l'assemblada generala de l'IEO. Lo Partit de la Nacion Occitana (PNO), present a l'eveniment, ne rendèt compte per l'intermediari de son correspondent C. Bosquet.

75ena Amassada Generala de l’Institut d’Estudis Occitans

Ongan se festèja lo 75en anniversari de l’Institut d’Estudis Occitans. Jamai direm pas pro que lo malhum de l’IEO es indispensable a la socializacion de la lenga nòstra. De mercés sos cercles locals, sas seccions departamentalas, sas seccions regionalas e enfin son nivèl federal, l’Institut d’Estudis Occitans es present pertot en Occitània. Son accion cobrís l’ensems del territòri nacional. Sas activitats son divèrsas e tòcan quasi totes los sectors culturals.

Aquela 75en Amassada Generala, inicialament prevista a Clarmont d’Auvèrnha lo 25 e 26 d’abrial de 2020, deguèt èsser reportada per las rasons sanitàrias que sabèm totes. Adoncas es pas que lo dissabte 10 d’octobre que se debanèt dins un format redusit, totjorn en causa de las condicions particularas impausadas per la marrana de la covid-19. Es en Lauragués, a Castèlnòu d’Arri, capitala istorica del caçolet, que se poguèron recampar los delegats de la federacion. Pas mai de 25 personas foguèron autorizadas a participar segon las prescripcions de las autoritats sanitàrias. Ni per aquò, l’Amassada Generala se poguèt debanar dins de condicions « gaireben » normalas. Aquò’s la valenta seccion audenca de l’institut qu’organizèt materialament la sesilha de trabalh. Un còp de mai foguèt fach de man de mèstre.

De delegats venguèron de Lemosin, de Gasconha, de Lengadòc e de Provença per constatar que l’annada 2020 èra estada complicada per causa del confinament sanitari. L’IEO escapèt a la funèsta sòrt que foguèt la de totas las entrepresas o associacions en Euròpa e quitament de pel mond. Ni per aquò, los afars essencials foguèron realizats per los benevòls e permanents de l’associacion. Notadament, l’IEO nacional contunhèt d’èsser l’interlocutor de las autoritats estatalas. Representèt tanben Occitània dins mantunes collectius culturals e reivindicatius al nivèl internacional. Un ròtle indispensable al benefici de totas las instàncias de la federacion que pòt èsser realizat pas que per l’IEO nacional.

Se debatèt tanben a Castèlnòu d’Arri de las orientacions de l’organisme per l’annada a venir. Se i a pas d’empachas, 2021 marcarà la represa normala de las activitats costumièras de l’organisme reconegut d’Utilitat Publica. Se ne vendrà quitament ajustar maitas a mesura que la levada de las constrenchas sanitàrias o permetràn.

Un rendut compte foguèt fach sus las activitats d’IDECO, que coma cadun sap, es l’organisme editorial de l’institut. Malgrat la malparada de la covid-19, la plega annadièra Atots es sul punt d’èsser liurada als soscriptors. Los que l’an pas encara comandada o pòdon far fins al 31 d’octobre de 2020 al prètz de 49 €. Per s’entrenhar, demòra pas que d’anar sul site net de l’institut. Soscrire a la plaga Atots es un biais de se far plaser, mas tanben de sosténer la literatura occitana e l’Institut d’Estudis Occitans, que l’una coma l’autre n’an plan besonh.

S’aqueste 75en anniversari se poguèt pas festejar coma esperat, 2025 deuriá marcar plan melhor los 80 ans de la federacion. Rendètz-vos es estat pres.

L’Amassada Generala venenta de l’IEO se debanarà los 17 e 18 d’abrial de 2021 a Clarmont d’Auvernha, esperem-o dins de condicions sanitàrias melhoras que las d’ongan. Retenètz aquelas datas que dins aquelas temporadas d’agressions perpetualas contra nòstra identitat, es del dever de totòm de sosténer l’Institut d’Estudis Occitans. Malgrat las dificultats nombrosas rescontradas, l’IEO demòra un actor màger dins lo panorama cultural occitan.

C. Bosquet