Lo 13 de novembre de 2021 se teniá a Narbona un acamp titolat : Es venguda l’ora de far de politica ? Remosava de personalitats politicas occitanistas. Aquesta reünion aviá per tòca de preparar las eleccions de 2022. Los participants publiquèran en conclusion lo tèxt que seguís :

Crida de Narbona

I aurà de candidats per representar las idèas regionalistas occitanas a las legislativas de 2022.

En seguida de las discussions que se son debanadas a Narbona dins l’encastre de la Dintrada es estat decidit d’ocupar lo terren electoral al mes de junh per las eleccions legislativas.

Avèm de promòure las idèas de descentralizacion, de desvolopament equilibrat dels territòris, de politica coerenta per lutar contra lo cambiament climatic, de defensa e de promocion de la lenga nòstra e d’autras encara.

La politica se deu far en çò nòstre e pas solament a París.

I aurà de candidats per dire aquelas causas e per portar aquelas idèas.

A Narbona ja un quinzenat de personas an dit lor intencion de se presentar e de faire campanha.

Podèm e devèm èstre mai nombroses per que pertot dins las regions de l’espaci occitan lo messatge pòsca passar e per que lo mai grand nombre d’electors pòscan dire que vòlon un vertadièr cambiament dins lo biais de far de politica.

Nos trobarem dins tres amassadas regionalas per organizar la mesa en plaça d’aquela sequéncia electorala que serà dubèrta a totas e a totes los que se reconeisson dins la necessitat de donar als territòris occitans una paraula politica.

La discussion de la lei Molac foguèt possibla sonque gràcias a una dinamica collectiva.

Nòstra iniciativa se farà dins l’encastre d’una volontat que se met en plaça dins d’autras regions e amb l’ajuda de Regions e Pòbles Solidaris.

Las personas interessadas per l’iniciativa e que vòlon èstre informadas an de clicar sul ligam seguent : https://bit.ly/cridaoc