Lo 30 d'agost de 2022 moriguèt Mikhail Gorbachev ancian dirigent de l'Union Sovietica. Lo 2 de setembre lo Partit Occitan comunicava sus l'eveniment.
La mòrt de Mikhail Gorbachev es l’autra fin de l’autre monde
Aqueste autre monde, lo que se trobava darrièr lo ridèu de fèrre, aviá un passat tragic, un passiu pesant ; li mancavan tanben perspectivas d’avenir. Gorbachev o aviá comprés. S’agís pas de far de culte de la personalitat, tanpauc d’aver una admiracion sens resèrvas per l’òme que ven de morir mas podèm pas que saludar sas iniciativas, sa capacitat a remetre en causa son monde.
Aviá comprés que caliá cambiar aquel sistèma que tuava la libertat, qu’èra totalitari e militarista. Es aquò que fa d’el un personatge qu’aurà marcat l’istòria del sègle XX mai que d’autres.
Gorbachev demorarà dins l’istòria coma l’òme qu’aurà comprés que son país deviá sortir de l’embarrament e daissar d’unes pòbles que o desiravan decidir de lor futur. Foguèt lo cas dels pòbles dels Estats dits « satellits » e tanben de pòbles qu’èran dins l’URSS e que prenguèron lo camin de l’autodeterminacion. Auriá pogut, coma los que passèron abans el, causir la via autoritària, la de las certituds. O faguèt pas e liberèt la paraula en permetent l’organizacion d’eleccions liuras. Lo risc èra d’autant mai grand que, fàcia a l’URSS, i aviá a aquela epòca de responsables occidentals fòrça dogmatics dins lor liberalisme economic e lors credéncias. Aquò ajudèt pas lo cap del Kremlin.
Per prendre la mesura de çò que Gorbachev faguèt, se cal remembrar çò qu’èra l’URSS abans el, d’Estalin en passar per Brejnev. Prenèm tanben la mesura de l’òbra quand ausissèm l’actual president rus, gessit de la maquina repressiva sovietica, regretar que l’URSS aja desapareguda. Es de segur aquela nostalgia qu’explica la guèrra contra Ucraina. Benlèu l’occident auriá ganhat a portar mai d’ajuda a Mikail Gorbachev per metre en òbra los cambiaments qu’aurián pogut menar a una democratizacion mens fragila.
Lo Partit Occitan
Setembre de 2022