Lo Partit de la Nacion Occitana comuniquèt a la fin del mes d'abril de 2023 sul projècte d'autorota Castras-Tolosa.
Lo Partit de la Nacion Occitana e lo projècte d'autorota Castras-Tolosa
Lo Partit de la Nacion Occitana se regaudís que lo governament vòlga desvolopar las infrastructuras dins la region Occitània centrala. A pro denonciat pel passat lo fach que los impòsts del contribuent occitan pagan las infrastructuras en region parisenca.
Lo cas de l'autorota Tolosa-Castras a pas res a veire amb lo Larzac de las annadas 1970 o uèi lo méga-projècte de gòlf e ostalariá de luxe de Fontièrs-Cabardés dins Aude, al detriment de noiriguièrs occitans, o per l'interès financièr del promotor Telcapi.
Aquela autorota dividís e a amassat de milièrs de personas opausadas a sa construccion pendent una manifestacion demorada pacifica lo dissabte 22 d'abril a l'apèl de la Via es liura, dels Soslevaments de la tèrra, d'Extincion Rebellion Tolosa e de la Confederacion paisana aital coma d'EELV.
Del costat dels partidaris de l'autorota se tròba : la Cambra de comèrci e d'industria de Tarn e 320 entrepresas localas que i veson lo mejan de desenclavar lo bacin de Castras e de Masamet. En mai, un sondatge Odoxa revèla que 75 % dels sondats locals son per l'autorota.
Del costat dels opausants : se nòta l'impacte environamental (abatatge de platanas), uman (disparicion d'espleitacions agricòlas) e economic (còst del peatge). L'amainatjament a quatre vias de la rota nacionala Castras-Tolosa seriá, segon eles, mens carestiós e mens damatjós per l'environament que la construccion d'una autorota parallèla a la rota nacionala.
Cèrtas, aquela autorota entraina la destruccion de 400 ectaras de tèrras agricòlas trabalhadas per 140 esplechaires, de bòscs e de zònas umidas.
Per consequent, lo Partit de la Nacion Occitana pensa que la proposicion d'amainatjar la nacionala existenta en plaça del projècte d'autorota meritariá d'èsser examinada e lors còsts comparats.
Tanben, las garantidas ofèrtas per la societat constructritz Atosca en matèria de desvolopament duradís, sustot reboscatge (en tenent compte de la malautiá de las platanas) e autrejament de novèlas tèrras als païsans expropriats, meritan d'èsser examinadas.
Lo Partit de la Nacion Occitana pensa que cal pas, al nom d'una ecologia pervertida, opausar proteccion de l'environament e activitat economica creatritz d'emplecs.
Cossí que siá, es als elegits territorials e a la populacion de decidir de la realizacion o non d'aquela autorota e pas a las associacions e als ecologistas locals o venguts d'endacòm mai.
Nosautres, occitans, volèm viure e decidir al país.
Lo Partit de la Nacion Occitana, abril de 2023