Lo 9 de novembre de 2024 l'ADEO e lo Partit Occitan prepausan de far un bilanç del camin fait pel movement occitan dempuèi sa creacion. L'objectiu es de donar la paraula a los que fan l’accion ara en 2024.
Es a partir de 1980 que foguèron fargadas las aisinas màgers que foncionan encara uèi, qu'aquò siá dins lo domèni de l’escòla, de la creacion culturala, dels mèdias, de l’edicion o tanben de l’accion politica. Abans, una generacion aviá preparat lo terren e aviá pausat las fondamentas.
A la debuta de las annadas 2000, se dubriguèt una etapa novèla e d’eveniments importants ajudèron al desvolopament del movement occitan. Se creèron d’aisinas novèlas e se desvolopèt un professionalisme dins de sectors divèrses. De manifestacions, que remosèron de milièrs de personas, venguèron sostenir las accions occitanistas.
Ara una generacion novèla a pres en man las operacions. Cossí vei l’avenidor aquesta generacion ? Quina concepcion de l’accion pòrta ? Ont ne sèm ? Quin camin es estat fait ? Quin camin demòra de far ? Aquí las questions pausadas per l'ADEO e lo Partit Occitan e que la farà l'objècte de la jornada del 9 de novembre a Tolosa.
Totòm es convidat a venir participar a aquel punt d’etapa, a venir soscar a tot çò que foguèt realizat e a preparar l'avenir.
Aquí çai-jos qualques elements de reflexions porgits pels organizators en responsa a la question : Èstre occitanista uèi, de qué vòl dire ?
- Èstre occitanista uèi, es saber quand arriba lo temps de la reflexion e quand ven lo del’accion.
- Èstre occitanista uèi es èstre conscient que lo combat nòstre es legitime, malgrat los messatges negatius que nos venon de lòcs ont explican que i a de combats mai importants. Coneis la ierarquia la libertat ?
- Èstre occitanista uèi, es considerar qu’una identitat se pòt pas simplificar. Se viu en bona intelligéncia amb los autres. Uèi coma ièr, devèm far que l’unitat dins la diversitat que caracteriza Occitània, siá un modèl novèl per viure amassa e per far amassa.
- Èstre occitanista uèi, es èstre una Occitana o un Occitan que sap que las questions s'entremesclan. Se batre per la lenga, aquò vòl dire se preocupar de son territòri, dels problèmas socials, economics e ecologics que lo pertòcan.
- Èstre occitanista uèi en 2024 es voler un environament de qualitat, diversificat e inclusiu a tot punt de vista. Es afrontar d'unas empachas de tot òrdre, sovent dogmaticas. Es subretot amassar totas las bonas volontats e encoratjar la creativitat.