La Region Aquitània comunica :
"Carta interregionau entà l' occitan.
"Au parat de l’amassada plenèra deu 24 d’octobre passat (2011), la region Aquitània qu’a adoptat la Carta de cooperacion interregionau e transfrontalèra de desvelopament de la lenga occitana. Lo conselhèr regionau d’Aquitània David Grosclaude que ns’assabenta "d’ua purmèra dens l’istòria de la politica lingüistica entà la lenga occitana".
"Las reconeishenças constitucionaus e legaus adoptadas aqueras darrèras annadas en França, en Itàlia e en Espanha que balhan a las institucions publicas l’obligacion de har tot entà la preservacion e de la transmission de las lors lengas e patrimònis.
"Aquesta carta que balha l’escadença d’obrar entà la sauvaguarda e lo desvolopament de l’occitan.
"En signant, las regions que s’engatgan dens un « partenariat » interregionau e transfrontalèr tà la tempsada 2011-2014, en hargar un quadre d’accions e ua armonizacion de las lors intervencions mes tanben d’establir bèths projèctes a l’entorn de l’aprenedissatge de la lenga, de la visibilitat publica de l’occitan, deus mèdias, de las industrias culturaus, de l’espectacle viu, d’apèrs lingüistics (com la creacion d’ua institucion de regulacion de la lenga occitana), deus patrimònis (materiaus e immateriaus) e de l’avaloracion d’aquestas politicas.
Dens las setmanas qui arriban lo tèxte que serà votat per tres regions de mei : Mieidia-Pirenèus, Lengadòc-Rosselhon e Ròse-Aups. Aquèra Carta que serà ubèrta a las signaturas de totas las regions pertocadas, en França, en Espanha e en Itàlia."