Dins son magazine numèro 1 (automne de 2017) la region Nòva Aquitània comunicava en occitan. Aquí çai-jos l'article :
Dròlles, parlatz a l’escòla !
Dempuèi mantuna generacions, las lengas regionalas s’aprenon a l’escòla per fin d’alentir la desagregacion de la transmission familiala. Dins quinas filièras estudiar las tres lengas de Novèla Aquitània ?
Ont aprene l’occitan, lo basc o lo peitavin-santongés ? Benlèu que vos remembratz d’un grand-paire o d’una grand-maire que parlava sa lenga regionala a l’ostal, al mercat o entre vesins. Parlatz aquela lenga ? Autrescòps la transmission familiala predominava. Mas los darrièrs estudis sociolingüistics son irrevocables : actualament, la transmission per l’escòla es mai eficaça.
Parents de Novèla Aquitània, mantuna causida vos son disponiblas per que vòstres enfants aprengan una de las tres lengas de la Region. L’ensenhament de las lengas occitana e basca es dispensat dins las escòlas, collègis e licèus del sector public e del sector privat, que siá confessional (catolic) o associatiu. Aqueste ensenhament pòt èsser extensiu (de quaranta cinc minutas a tres oras per setmana) o intensiu. Dins aquel cas, lo sector public privilègia l’aprendissatge bilingüe (fins a 50 % del temps escolar dins lo primari).
Lo sector associatiu demòra lo campion de l’aprendissatge immersiu. Totas las matèrias son alara ensenhadas dins la lenga regionala fins en CE1 (levat las disciplinas lingüisticas, solide) coma dins las ikastolak del País basc o las escòlas Calandreta per l’occitan.
Pasmens, las tres lengas regionalas de Novèla Aquitània ofrisson de contèxtes plan diferents.
Se, al País basc, un enfant sus dos es escolarizat en filièra bilingüe o immersiva, a pena 1,5 % de escolans benefícian d’aqueste tipe d’ensenhament per l’occitan. Per çò qu’es del peitavin-santongés, se deu acontentar d’activitats extraescolaras, son ensenhament perque es pas reconegut a l’ora d’ara per l’Educacion nacionala.
Demest aquelas accions per sosténer las lengas regionalas, la Region finança en partida l’Ofici public de la lenga basca e l’Ofici public de la lenga occitana, vertadièrs relais de la politica regionala dins lo domeni lingüistic. Amb aqueles oficis publics, la Region va, dins pauc de temps, oficializar la signatura de doas convencions-quadre que permetràn d’adaptar d’objectius d’ensenhament a cada acadèmia. Atal, per l’occitan, que concernís tanben las acadèmias de Peitieus e Lemòtges, l’acadèmia de Bordèu deu dobrir dins lo primari 30 novèls sites publics bilingües sul periòde 2017-2022 (un site per departament e per an). Lo peitavin-santongés pòt acampar el tanben los escolans tre la mairala : lo concors Imatges e tèxtes en peitavin-santongés es estat ganhat ongan per l’escòla Alphonse-Daudet, a Peitieus, dins lo quartièr popular de las Couronneries.