Lo 22 de setembre de 2020 en prevision de l'eveniment del 10 d'octobre, la FELCO comunicava.
10 d’octobre de 2020. Desconfinhem las nòstras lengas – Jornada decentralizada de mobilizacion per las nòstras lengas
Après lo recampament davant lo ministèri de l’Educacion Nacionala lo 30 de novembre de 2019 a París, lo collectiu Pour Que Vivent Nos Langues compausat d’elegits e d’associacions (IEO, FELCO, Calandreta, Felibrige, Congrès... pels païses occitans), crida a d’acamps reivendicatius decentralizats lo 10 d’octobre per interpelar los poders publics sus l’avenidor de las lengas minorizadas.
Es important de i èsser totes e totas : en mai de las atacas del ministèri de l’Educacion Nacionala contra l’ensenhament de las lengas (ne farem pas la tièra tant qu’es longarassa) ara son totas las autras esfèras culturalas (vida artistica, vida associativa, mèdias...) que son mesas en dangièr per las politicas d’austeritat.
Nòstre ensenhament coma nòstras manifestacions artisticas patisson tanben de la situacion sanitària.
La politica lingüistica del govèrn va a rebors de las promessas del candidat Macron mas tanben de bona part de l’opinion publica.
Rampelam que per exemple l’enquèsta recenta menada per l’OPLO a mostrat que 79% dels abitants de las acadèmias cobèrtas per l’OPLO son favorables a « des actions conduites par l’État et les collectivités publiques pour maintenir ou développer l’occitan », 81% son « favorables au développement d’une offre d’enseignement de l’occitan ».
D’un biais general l’interès educatiu de l’ensenhament de l’occitan es reconegut. Dempuèi de decenias, de milions d’enfants de la Republica an seguit de corses d’occitan. Aquesta lenga, vector d’integracion e de dubertura sul mond permet als pichons de comprene lo luòc onte vivon. A travèrs de son ensenhament, de projèctes valorizant lo patrimòni d’una region e doncas de França contribuïsson a bastir un esprit de ciutadanetat en cò dels enfants.
De recampaments son previstes lo 10 d’octobre a Lila, Baiona, Ajaccio, Estrasborg, Granòble (Occitan e francoprovençal), Ais, Montpelhièr, Niça.
Per aqueles recampament lo collectiu daissa carta blanca a las associacions localas sus las modalitats de mobilizacion : manifestacion, cadena umana, happening.
Venètz totes e totas nombroses, amb las vòstras familhas, amics, idèas, plancardas, drapèus, instruments de musica ; trantalhassètz pas de prene contacte amb las associacions organizatrises !