Lo 15 de genièr de 2022 se creava a París La Fédération des Pays Unis a l'iniciativa de cinc organizacions autonomistas :
- Bastir Occitanie ;
- le Parti Breton ;
- le Parti Lorrain ;
- le Parti Nationaliste Basque (ENJ-PNB) e
- Prouvènço Nacioun
Mathieu Guihard del Parti Breton n'es lo président. Jean-Luc Davezac de Bastir Occitanie n'es lo vice-president.
Lo principals partits autonomistas son ja federats en França al còr de Region et peuples solidaires (R&PS), organizacion que se posiciona a l'esquèrra de la vida politica francesa. Lo Partit Occitan (POC) per exemple o l'Union Democratique Bretonne (UDB) ne fan part.
La creacion d'aquela nòva federacion, La Fédération des Pays Unis, sembla per part deguda al fach que sos membres son pas admeses a Region et peuples solidaires. A la fin de 2021 l'UDB s'opausèt a l'intrada del Parti Breton al sen de R&PS.
Al nivèl occitan aquesta creacion menèt l'associacion Assemblada Occitana (AO) a reagir lo 17 de genièr de 2022. Sos membres considèran que l'aligança de Prouvènça Nacioun e de Bastir Occitanie excluís Bastir Occitanie del movement occitanista estant las posicions de Prouvènço Nacioun rapòrt a la lenga occitana. Segon l'AO, Prouvènço Nacioun reconeis pas l'unitat de la lenga nòstra.
Lo 21 de genièr de 2022, lo Partit de la Nacion Occitana (PNO) tornava sus l'eveniment e sus la reaccion de l'Assemblada Occitana que lo PNO dins son comunicat considerava « sevèra e injustificada ».
Tornam publicar çai-jos los comunicats d'aqueles dos gropaments.
Es tanben de notar qu'al mes de genièr de 2022 l'Ostau dau País Marselhés comunicava sul subjècte.
*
1 – Comunicat de l'Assemblada Occitana (17/01/2022)
Defensa de Provença : lo grop “Bastir-País Nòstre” crèa un escàndol e s’autoexclutz dau movement occitanista
Venèm d’aprene que lo grop politic “Bastir-País Nòstre” (que se fa apelar exactament “Bastir Occitanie” e “Occitanie País Nòstre”) ven de far una aliança amb un autre grop politic, “Provença Nacion” (“Prouvènço Nacioun”).
Òr, se saup que lo grop “Provença Nacion” a de posicions ostilas a l’unitat de la lenga occitana : “Provença Nacion” pretend que lo provençau seriá pas dins la lenga occitana : aquela posicion fantasiosa es en contradiccion amb l’occitanitat dau provençau qu’es afortida dempuei lòngtemps per lei lingüistas, per Robèrt Lafont, per Frederic Mistral, per lo Felibritge, per l’Institut d’Estudis Occitans (IEO), per lo Conseu de la Lenga Occitana (CLO) e per lei ministèris de la cultura e de l’eduacion.
L’error de “Provença Nacion” se pòt explicar benlèu per una forma d’alienacion e d’ignorància de sa pròpria cultura provençala.
Per còntra, l’error dau grop “Bastir-País Nòstre” es fòrça mai grèva. “Bastir-País Nòstre” agís pas per ignorància, agís per immoralitat en traïssent leis occitanistas provençaus.
Tanben, lo grop “Bastir-País Nòstre”, confinhat a la Region de Tolosa, sembla completament ignorant de çò que se passa realament en Provença.
Ai darriereis eleccions regionalas de 2021, en Provença, la lista Òc per Provença se presentèt amb un programa clarament occitanista e foguèt sostenguda per lo Partit Occitan, per l’Assemblada Occitana e per lo PNO. Òr, sus aquela basa occitanista, Òc per Provença ganhèt un 2,18 % dei votz.
Per còntra, lo grop antioccitanista “Provença Nacion” se presentèt pas ais eleccions regionalas. Donc atenh pas la legitimat de la lista Òc per Provença.
En comparason, dins la Region de Tolosa (apelada abusivament “region Occitània”), la lista “Bastir-País Nòstre” aguèt solament un 0,76 % dei votz. “Bastir-País Nòstre” arriba pas au nivèu de representativitat de la lista Òc per Provença.
Es evident que “Bastir-País Nòstre” a una posicion irracionala e antioccitanista. Aqueu movement, que benlèu foguèt interessant dins leis ans 1990, uei a traït sei valors d’origina, a traït sei compatriòta occitans de Provença e, donc, a cessat de far partida dau movement occitanista.
L’ataca de “Bastir-País Nòstre” s’apond a l’ataca recenta còntra l’unitat de la lenga occitana en Provença qu’es proferida per una brocadura messorguiera dau rectorat d’Ais-Marselha.
Es clar qu’en Provença, sauprem reagir per restaurar la veritat lingüistica e culturala :
Lo provençau es d’occitan !
Provença es en Occitània !
L'Assemblada Occitana
2 – Comunicat del Partit de la Nacion Occitana (21/01/2022)
Responsa a l’Assemblada Occitana
Lo comunicat de l’Assemblada Occitana intitolat : Lo grop “País Nòstre” crea un escandòl e s’autoexclutz del movement occitanista es una critica plan sevèra e injustificada, a nòstre vejaire, de “País Nòstre”. D’en primièr, pèca per manca de precision. En efièch, es pas “Occitània País Nòstre” (lo movement occitanista) nimai lo “País Nòstre” istoric (associacion lengadociana creada per Joan-Pèire Laval) que participan a la federacion regionalista “Pays Unis” que ven d’espelir mas “Bastir Occitània” quitament se de sòcis d’aquel movement son tanben al burèu de “Occitània País Nòstre”.
Lo problèma per l’Assemblada Occitana es la preséncia dins aquela federacion “Pays Unis” del movement Prouvènço Nacioun que fa del provençal, del nissart e del vivaro-alpenc de lengas distinctas de l’occitan e de la Provença una nacion, çò que va encontre de l’etnisme de Francés Fontan. Per lo Partit de la Nacion Occitana, la Provença fa partida d’Occitània, e lo provençal dins totas sas variantas es un dialècte de la lenga occitana.
L’estudi del site wèb de “Prouvènço Nacioun” revèla pas un anti-occitanisme primari de l’estil del “Couleitiéu Prouvènço”.
D’alhors, es indispensable que los partits o movements que compausan la federacion “Pays Unis” sián d’acòrdi sus tot ?
Per prene l’exemple del Parti Breton, aqueste es per la Bretanha istorica del Ducat mentre que lo Partit de la Nacion Occitana es per la Bretanha etno-lingüistica que inclutz ni Rennes nimai Nantas. Aquò nos deu pas empachar de trabalhar amb eles sus çò que nos reünís.
Per tornar a Provença, lo paure Jaume Ressaire, èx-president del Partit de la Nacion Occitana, pensava que lo desvolopament de l’independentisme en Occitània poiriá èsser pro desparièr segon las regions. Exclusiá pas l’emergéncia d’un independentisme provençal.
Una posicion segon lo modèl de l’Assemblada Occitana consistiriá a condemnar Puigdemont per aver proclamat l'independéncia d'una Catalonha reduita a la Generalitat, en "traïssent" Balearas, Pais Valenciá, Rossellò etc.
Lo dogmatisme de l'AO mòstra una volontat d'usurpar una representativitat de l'independentisme occitan.
L’Assemblada Occitana se crei autorizada a decretar que “Bastir Occitània” que confond amb “País Nòstre” s’auto-exclutz del movement occitan e invita las autras compausantas del movement politic occitan a denonciar aqueles traites. L’Assemblada Occitana dont lo ròtle deuriá èsser de recampar totes los militants occitans en fach los devesís entre “bons” et “marrits”.
Lo Partit de la Nacion Occitana desaprova donc lo comunicat lapidari de l’Assemblada Occitana e lo co-signarà pas.
Per quant a la question de l’adesion eventuala del Partit de la Nacion Occitana a la federacion “Pays Unis”, i cal soscar e serà l’objècte d’una discutida al dintre del Partit.
Una discutida d’autant mai necessària que l’adesion del PNO a R&PS es totjorn blocada per son president, l’occitan Gustau Aliròl. Pays Unis pòt venir un R&PS bis dins loqual lo PNO podriá intrar aisidament.
Lo Partit de la Nacion Occitana
3 – Lo Partit Occitan comuniquèt tanben lo 10/02/2022 : legir lo comunicat