Lo 15 de genièr de 2022 se creava La Fédération des Pays Unis a l'iniciativa de cinc organizacions autonomistas. Bastir Occitanie ne fasiá part. Lo Partit Occitan per l'intermediari de David Grosclaude precisèt al mes de febrièr de 2022 son rapòrt a Bastir Occitanie.
Per rapòrt a « Bastir Occitanie », la posicion del Partit Occitan
De negociacions se debanèron a la fin del mes de decembre entre lo Partit Occitan e d’unes grops e personas per veire s’èra possible de metre en plaça de candidaturas comunas e dubèrtas per las legislativas de junh de 2022.
Dins los grops que parlavan ambe nosautres i aviá « Bastir Occitanie ».
Aquel grop a decidit, al mes de genièr, de participar a la creacion d’una federacion de partits regionalistas de l’Estat francés, un còp que nòstras discussions avián començat.
Avèm constatat que dins aquela federacion se trobava un grop provençal que son amira e sas accions antioccitanistas son claras e reivindicadas.
Avèm informat « Bastir Occitanie » que comprendriam pas que trabalhèssen amb nosautres, Partit Occitan, e en meteis temps amb un grop que s’opausa regularament a nòstre partit en Provença.
Tanben, avèm constatat que de relacions entre de militants d’aquela organizacion provençala e de partits d’extrèma drecha nos semblavan claras e evidentas.
Avèm demandat als responsables de « Bastir Occitanie » de clarificar lor situacion. Sens clarificacion consideram qu’es pas possible de seguir de discussions.
Contunham de segur de trabalhar e de discutir amb de personas fòra de nòstre partit, que se reivindican clarament de l’occitanisme, qu’afirman clarament que Provença, amb son identitat, fa partida de la granda Occitania, coma es lo cas d’autras regions occitanas qu’an lor personalitat mas que son unidas per la lenga d’òc e qu’an d’interèsses en comun del punt de vista politic, economic, cultural e ecologic.
Per lo Partit Occitan, lo secretari
David Grosclaude lo 10/02/2022 sus partitoccitan.org