Lo 15 de març de 2022 lo ministre francés de l'interior Gérald Darmanin declarava que lo govèrn « èra prèp a anar fins a l'autonomia » de l'isla de Corsega. Aquela declaracion aquèt luòc après l'agression d'Yvan Colonna e los trebolitges que se descadenèran en Corsega. Lo 15 de febrièr lo Partit Occitan se posicionava sus l'eveniment.

Corsega : perqué an esperat tant de temps ?

Çò que se passa a prepaus de Corsega sembla fòrça un biais d’encoratjar la violéncia. Es de non pas comprendre en Republica.

Fa d’annadas que los partits nacionalistas ganhan las eleccions, que son majoritaris a l’Assemblada de Corsega e que presidisson l’executiu còrs.

Fa d’annadas que lo poder central parisenc refusa de dialogar amb los representants elegits del pòble còrs sus la question de l’autonomia.

Es sonque en seguida de nueits e de jorns de manifestacions fòrça violentas que lo poder executiu francés pren, enfin, la decision de metre sus la taula las questions que son pausadas dempuèi d’annadas pels elegits còrses. S’agís plan d’un biais d’encoratjar la violéncia coma arma politica pr’amor las vias democraticas classicas foncionan pas. Sèm dins lo domèni de la provocacion.

Aquò es vertat per las discussions sus l’estatut de l’isla coma es vertat per las discussions pertocant l’estatut dels prisonièrs còrses, que lo retorn dins una preson còrsa es demandat fa fòrça temps.

L’incapacitat del poder central que per tractar amb serenitat de tèmas que preocupan las populacions es inquietanta. Es la manifestacion d’una flaquesa democratica, particularament sensibla dins los domènis que son la descentralizacion del poder e la reconeissença de las identitats culturalas e lingüisticas.

Que la violéncia siá l’unica faiçon de se poder far ausir del poder central mòstra plan coma una administracion centrala, esclerozada, condescendenta, auturosa pòt èstre mespresanta.

Que los responsables politics practiquen aquel jòc nos pòrtan una pròva de mai que lo centralisme es un perilh per la democracia e la patz sociala.

Lo Partit Occitan lo 15/03/2022