A l'escansença de la presentacion d'un nòva lei sus l'audiovisual lo Collectiu Occitan se tornava reviscolar. En octobre de 2022 lo PNO comunicava sul subjècte.
Lo PNO sosten las revendicacions del Collectiu Occitan
Al moment ont lo govèrn vòl presentar una lei novèla sus l’audiovisual, lo Collectiu Occitan se reviscòla.
Lo Collectiu Occitan es una plataforma de revendicacions1 virada cap a l’audiovisual elaborada per mantunas associacions e partits politics occitans o pas2. Foguèt creada en 2019 e organizèt ja a l’epòca diferentas accions de sensibilizacion populara resumidas jos l’eslogan « L’occitan cada jorn a la television ». Lo Partit de la Nacion Occitana ne foguèt part prenenta tre la debuta. Participèt a las manifèstacions popularas e a la campanha de sollicitacion de las comunas per que deliberèssen e votèssen de mocions de sosten a una difusion jornalièra de l’occitan sus la cadenas de television e las antenas de ràdio del servici public. Una campanha que foguèt fòrça capitada, mas que coma de costuma, recebèt pas que lo mesprètz de las autoritats opressivas.
Aqueste combat per l’occitan dins los mèdias foguèt subtament interromput per la pandèmia de la covid-19. Torna prene tre lo dimècres 23 de novembre de 2022. De conferéncias de premsa serán organizadas, d’entrevistas amb los caps d’establiment dels mèdias del servici public serán sollicitadas e apevadas per de recampaments populars devant los dichs establiments. Aqueles acamps prendrán, coma tres ans fa, la forma d’aperitius revendicatius. Aquelas manifèstacions an per tòca de far la demonstracion de la demanda sociala per una vertadièra politica de resocializacion de la lenga nòstra.
Son ja prevists pel 23 de novembre de 2022 a miègjorn d’aperitius revendicatius davant los locals de França 3 a Tolosa e a Montpelhièr, mas lo Collectiu a vocacion a s’espandir sus l’ensems de l’espaci nacional occitan (Bordèu, Marselha, Clarmont d’Auvèrnha e Lemòtges).
Conscient qu’obtendrem pas que çò que revendicarem, lo Partit de la Nacion Occitana demanda a sos sòcis, sos simpatisants e a totes los occitans d’i participar d’un biais actiu amb bandièras e bandairòlas.
Amb lo Collectiu Occitan e lo Partit de la Nacion Occitana volèm « L’occitan cada jorn a la television » !
Lo PNO (10/10/2022)
Nòtas
1 Demest las reivindicacions : una preséncia consequenta e quotidiana de la lenga nòstra sul malhum dels mèdias del servici public e mai que mai de França 3 e las antenas localas de Ràdio França.
2 I participan ara per ara (mas la tièra se pòt enriquesir) : L’Institut d’Estudis Occitans, lo Felibritge, la confederacion Calandreta, Convergéncia Occitana de Tolosa, lo Congrés, Batir, País Nòstre, lo Partit Occitan, lo Partit de la Nacion Occitana e la federacion centroccitana de Euròpa Ecologia Los Verds.