Se tendràn los 30 de junh e 7 de julhet de 2024 en França d'eleccions legislativas. Per l'ocasion lo Partit de la Nacion Occitana (PNO) comunica.
Una candidatura del PNO sus la 5ena circonscripcion de Garona Nauta
Coma totes los partits politics, lo Partit de la Nacion Occitana es estat susprés per la dissolucion gaire prevesibla de l’Amassada Nacionala anonciada lo 9 de junh pel President Macron. Nimai per la temporada corteta daissada a las organizacions politicas per se revirar, dins l’urgéncia lo PNO a sabut, ça que la, se mobilizar per presentar una candidatura.
Es la cinquena circonscripcion de Garona Nauta qu’es estada causida. Una circonscripcion ont ja lo PNO es estat present e ont l’es regularament dempuèi de decennias. Aqueste còp la candidata n’es Silvia Bonnemaison mentre que son suplent es Sèrgi Viaule. Lo partit a mes tot en òbra per menar una campanha de terren. Un còp mai lo PNO va anar a l’endavant de las Occitanas e dels Occitans per lor prepausar son programa politic. Alavetz, cridam tre ara totas las ciutadanas e ciutadans de l’airal concernit d’aprofechar de l’escasença per votar per una Occitània autonòma dins una França federala.
Lo PNO regreta la precipitacion dins la quala aquelas eleccions son estadas anonciadas. Dins parivas circonstàncias, non pòt presentar maitas candidaturas, mas balha rendètz-vos a totes pels escrutins venents.Comunicat de premsa del PNO
16 de junh de 2024