Dins l'encastre del fòrum dedicat a l'Intelligéncia Artificiala (AI) que se debanèt a París a la debuta del mes de febrièr de 2025, Ursula von der Leyen anoncièt la mesa en plaça al nivèl de l'Union Europèa d'un partenariat public-privat de 200 miliards d'èuros per desvolopar las tecnologias ligadas a l'IA.
« Aquò serà lo mai grand partenariat public-privat dins lo mond pel desvolopament d'una IA fisabla » declarèt la presidenta de la Comission Europèa.
Cinquanta miliards seràn aportats per l'Union e cent cinquanta per las entrepresas partenàrias. L'aligança baptesada EU AI Champions Initiative compren mai de seisantas entrepresas europèas ligadas al desvolopament de l'IA coma Airbus, L’Oréal, Mercedes, Siemens, Spotify o encara Mistral AI.
L'objectiu de l'aligança es de deblocar lo potencial d'Euròpa dins lo domèni de l'IA, e de simplificar lo quadre reglementari necessari al desvolopament d'aquela tecnologia novèla.