28/09/2017 - La cadena occitana e nòrd catalana
TV Sud càmbia de nom per venir ViàOccitanie. Basada a Tolosa,
Montpelhièr, Nimes e Perpinhan serà disponible sul canal 31 de
la TNT e 30 sus las boitas.
Abandona sa collaboracion amb Tè Vé Òc, donc sa programacion en occitan.
Aquel cadena se presenta coma un mèdia d'informacion sus la region. Propausarà un flach cada mièja oras e de, 18h30 a 19h30, d'actualitats mai localas.
Son director de las publicacions e de las redacions, Jean Brun, presenta ViàOccitanie coma « lo sol mèdia audiovisual a l'escala de la region Occitània », França 3 estent deseparada en doas : una per Miègjorn Pirenèus e l'autra per Languedòc Rosselhon, doas entitats administrativas qu'existisson pas pus.
Per poder far viure aquela cadena dètz e sèt jornalistas son estats recrutats.
Aquela entitat es ligada al grop Vià que baileja tanben l'anciana Telif venguda ViàGrandParis. Lor fondators an per ambicion de constituïr un malhum de cadenas localas a l'escala francesa.
L'emission occitana fa donc los fraisses d'aquel cambiament. Aquí çai jos la comunicacion de la còla de Tè Vé Òc qu'aprestava l'emission "Lenga d'Òc" :
« Onte n'es "Lenga d'Òc", emission prepausada per Tè Vé Òc ?
« Après d'annadas de contribucion dins l'espandiment de la lenga nòstra sus lei cadenas de TV Sud (Camarga-Cevenas, Montpelhièr, P-O), lo grop MediasduSud met fin a nòstra collaboracion tre lo 1er d’octòbre.
« Lo motiu es son cambiament totau de programas e de linha editoriala. TV Sud es venguda lo 28/09/2017 ViàOccitanie, e se muda en cadena d'informacions contunha regionala, sens plaça per lo magazine "Lenga d'Òc".
« Pasmens, nòstra emission contunha sus d'autrei supòrts, coma lo site de Tè Vé Òc, Occitanica restacat au Cirdòc, lo site de la Fimòc que recampa un molon de mèdias, e sus lo site dau Cep d'Òc, especializat dins lei òbras audivisualas en òc.
« "Lenga d’Òc" desapareis pas e contunham d'obrar per vos porgir una actualitat en lenga nòstra amb 4 emissions per mes.
« Vos remercejam de vòstra fidelitat. »