Novembre de 2017. A Sant Sulpici la Punta, dins lo departament de Tarn, los noms de las carrièras son ara
en occitan.
Aquela accion de la comuna permet de valorizar la lenga nòstra, d'afortir sa legitimitat en país occitan, mas tanben de legitimar son emplec e sa socializacion.
Sèrgi Viaule sul site del Partit de la Nacion Occitana precisa las condicions que permetèran la concretizacion d'aquesta demanda dels ciutadans.
Un combat vièlh de trenta ans, la primièra demanda foguèt facha al municipi en 1985.
E de Precisar : « Foguèt malaisit de far reconéisser que l’occitan es la lenga naturala e istorica de la vila, quitament se la carta de fondacion de la ciutat - que data de 1243 - es escricha en lenga nòstra. Compte tengut de l’istòria pròpria de la bastida, l’occitan deu èsser considerat, promòugut e socializat a Sant Sulpici. O deu èsser per los que parlan encara la lenga, emai per los que la parlan pas mai per l’aver perduda o los que la parlan pas encara mas qu’an enveja de l’aprene.
« Es d’ont mai caporal de far paréisser publicament l’occitan a Sant Sulpici que desempèi trenta ans la comuna es site d’una filièra bilingüa de l’ensenhament public. Un ensenhament bilingüe que comença tre l’escòla mairala (una d’aquestes establiments es batejat del nom de Loisa Paulin), fin a la fin del collègi (la vila possedís pas encara de licèu). »