Ongan en 2017 lo govèrn francés a anonciat que creava una agregacion d'occitan. Un pòste solament es previst pel concors de 2018 e sonque quatre pel CAPES.
La FELCÒ (Federacion dels Ensenhaires de Lenga e de Cultura d'Òc) comunica sul subjècte.
Un pòste a l’agregacion, quatre pòstes al CAPES d’occitan 2018 : se trufarián pas de nosautres ?
A la prima passada, los ensenhaires d’occitan se regaudissián, après d’annadas de demandas vanas, de la creacion d’un concors d’agregacion de lengas de França – opcion occitan, mai de 20 ans après la creacion del CAPES. La dubertura de l’agregacion dubrissiá enfin de possibilitats d’evolucion de carrièra als centenats de professors en pòste en licèus e collègis, e ofrissiá de perspectivas als estudiants. De formacions dubriguèron a Tolosa et Montpelhièr.
Un cinquantenat de candidats se marquèron al concors et se metèron amb estrambòrd a la preparacion d’espròvas exigentas ; los universitaris elaborèron de corses, organizèron de simulacions d’espròvas, de jornadas de trabalh mutualizadas entre las doas universitats. La preparacion del concors veniá tanben un luòc de perfeccionament dels sabers dels ensenhaires.
Mas los pòstes venon de paréisser [novembre de 2017] : un solet per l’occitan ! Es-a-dire un pòste per 50 candidats ! aquela decision ten del mesprètz mai brutal e l’acceptam pas, quines que ne sián los pretèxtes, mai que mai budgetaris : la realitat dels candidats fai que son ja ensenhaires, afectats sus de pòstes. S’agís donc pas de creacion de ressorsas novèlas, mas soncament de la possibilitat d’una promocion que los metèsse a egalitat amb lors collègas de las autras disciplinas.
Apondèm a aquò que lo nombre de pòstes al CAPES 2018 es pas que de quatre : (siá una baissa de 33 % per rapòrt a la session 2017), e que l’espaci occitan compta 32 despartaments, qu’una bona part an pas cap de professor del segond gra titulari (Ardècha, Droma, Crueisa, Corrèza, Nauta-Viniana, Puèg Domat, Aups de Provença Nauta, Autas Aups), e mesuram l’ample del mesprètz de cap a una lenga pr’aquò inscricha dins lo patrimòni nacional (Art. 75.1 de la Constitucion).
Del temps de la campanha presidenciala, lo candidat Emmanuel Macron, qu’afortís que fai totjorn çò que ditz, explicava que facilitariá, « dès l’école, l’apprentissage des langues et cultures régionales, dont l’intérêt éducatif, linguistique et culturel est reconnu. ». Lo quite sénher Macron que s’estrambordava a Pau lo 12 d’abril passat sur aquela « France plurielle » e « ses belles langues régionales » que, çò disiá « je veux reconnaître et que nous reconnaîtrons ».
Podèm pas que nos estonar que lo ministèri de l’Educacion nacionala causisca lo camin invèrs. O acceptam pas. E o farem saber publicament... Informam tre ara nòstres elegits, deputats e senators, representants de las collectivitats territorialas, e mai las organizacions sindicalas. Demandam a totes los ciutadans d’aqueste país estacats a sa pluralitat lingüistica e culturala de sosténer nòstra demanda d’augmentacion de pòstes a la session 2018 per los concorses de l’agregacion e del CAPES.
Marie-Jeanne Verny