A la fin de l'an 2017 Bernat Bergé, vici president de l’EOE-IEO 47 dins un comunicat alertava sus la situacion de l'associacion. Aquí çai jos lo sieu tèxt :

Amigas, Amics,

Una baissa de las ajudas, las recèptas dels darrièrs estagis insufisentas, l’agotament de las nòstras resèrvas, menan la nòstra associacion sul solhet de la falhida.

Ja per onorar las darrièras escasenças, foguèrem dins l’obligacion d’un manlèu que nos consentiguèt un sòci de l’associacion.

En esperar las avanças sus las subvencions venentas – que riscan encara de se demesir o per d’unas benlèu de desaparéisser completament – sens un apòrt novèl d’argent nos caldrà botar la clau jos la pòrta : la situacion nos permet pas de tenir dinca als estagis de 2018.

Seriá la fin de l’aventura entemenada fa quaranta tres ans ; seriá la fin d’aquel estagi d’occitan per immersion, lo sol que se fague ; un utís de mai per promòure, ensenhar, illustrar, far viure la lenga nòstra se brigalhariá ; una lutz que lusís dempuèi quaranta tres ans s’escantiriá ; l’abeurador que i son venguts se desassedar un public de primo-locutors, neo-locutors, artistas, escrivans, desconeguts e celebritats, ancians suls camins de memòria, jovents e jovenòts que son l'avenidor de la nòstra lenga (public novèl representant 70 % cada an), aquel abeurador s’assecariá. La lenga nòstra se perdriá un membre.

Per dos còps ja, en 2008 e en 2014, avètz salvat l’EOE amb las vòstras contribucions ; sens vosautres, l’EOE auriá ja desaparegut. Uèi encara, un còp de mai, lo cotèl jos la gargamèla, sèm obligats de parar la man e de demandar a totes los que pòdon de contribuir a la salvason de l’EOE

La vòstra ajuda es lo sol mejan de tirar del fangàs l’EOE, un utís unic qu’a fait sas pròvas e que far totjorn mestièr, uèi mai que jamai, per l’avenidor de la nòstra lenga e de la nòstra cultura. Podèm pas comptar que sus nosautres. Me pòdi pas plegar a l’idèa que sèm a morir o que sèm ja mòrts. Ai besonh de creire que tota l’energia desplegada dempuèi un mièg segle se pòt pas avalir dins lo non-res.

Anèm, l’alba tornarà puntejar, ne soi convençut, l’esperarem amassa e un maitin tornarem cantar.

Per l’EOE, per l’occitan, d’avança vos mercegi.

Bernat Bergé