Après las eleccions del 21 de decembre de 2017 en Catalonha, lo Partit de la Nacion Occitana comunica :
Eleccions en Catalonha
Lo dijòus 21 de decembre de 2017 unes 5 780 775 electors emai electrices catalans ciutadans de la Generalitat de Catalunya o residents a l’estrangièr èran cridats a las urnas per designar lors deputats al Parlament de Catalonha.
Aquestas eleccions convocadas en aplicacion de l’article 155 de la constitucion coloniala espanhòla de 1978 venián apuèi la declaracion Unilaterala d’Independéncia de Catalonha proclamada lo 27 d’octòbre de 2017 per la majoritat sobeiranista eissida de las eleccions de setembre de 2015.
Coma pel referendum del 1er d’octòbre de 2017, contestat pel poder colonial espanhòl e los partits espanholistas agissènt en Catalonha, lo pòble de Catalonha es anat votar massissament.
Malgrat totes los esfòrces dels partidaris de l’union de Catalonha amb Espanha, lo pòble catalan a renovelat sa fisança als 3 partits independentistas (Junts per Catalunya, ERC et CUP) en los i balhant la majoritat absoluda en sètis en tot renegar sens cap de dobte lo Partido Popular del Rajoy.
Lo Partit de la Nacion Occitana saluda aquesta resulta incontestabla compte tengut d'un taus de participacion dels plan nauts.
La question de l’Independéncia de Catalonha serà tornarmai sus la taula.
Lo Partit de la Nacion Occitana espèra que los independentistas sauràn subremontar lors divisions per exercir lo poder e atal contrar l’enauçada dels anti-independentistas de Ciudadanos, que son uèi la primièra fòrça politica al Parlament catalan.
Una solucion negociada d’un biais pacific depend ara del govèrn espanhòl que se deu pas entestardir dins la carrièra bòrnha de l'article 155 de la constitucion.
Aqueste govèrn deu tanben desliurar los capdaus catalans empresonats e permetre als que s’exilièron en Belgica de tornar al país sens los amenaçar de gabiòla.
Mai que jamai, L’union Europenca sembla pas dispausada a téner compte de la volontat del pòble catalan.
Totun, caldrà ben que prenga sas responsabilitats per que lo govèrn espanhòl entamene un dialòg amb los independentistas catalans.
22/12/2017