Genièr de 2018, lo Collectiu Occitan organizator de las manifestacions
del 3 de febrièr de 2018 per demandar una preséncia mai importanta de la lenga occitana a
la television, comunica :
La lenga e la cultura occitanas an un besonh imperatiu, absolut, dins lo mond tal coma es ara, d'aver accès als mèdias de massa e d'en primièr, d'una preséncia « normala » a la television publica.
Es un relai indispensable per tota l'accion educativa e culturala qu'es menada per las associacions.
Per aquò devèm reivindicar mai de plaça per l'occitan a France 3, manifestar que « Volem nòstre occitan de cada jorn » a la television publica. Aquesta reivindicacion es fondamentala.
De mai sèm dins lo temps que cal : lo govèrn es a aprestar una reforma de l'organizacion de la television publica.
Es lo moment que cal per se faire ausir e demandar que lo Quasèrn de Cargas de la television publica siá aplicat d'un biais mai egalitari sul territòri de la Republica, es a dire per l'occitan, al nivèl de çò que se fa per d'autras lengas regionalas.
Coma es temps de reforma del servici public de television e ràdio devèm tanben, coma movement occitan, portar nòstre vejaire sus aquesta granda question. Devèm dire que nos cal a nautres, ciutadans franceses dels territòris, ciutadans de las regions, una vertadièra television de país. Una cadena qu'a de redaccions dins las ciutats del territòri, que filma lo país, lo representa dins son quotidian, sa diversitat.
E aquò passa per la preséncia de redaccions e còlas de filmatge en mantuns luòcs. L'occitan clau per una television melhora, demanda una vertadièra television de país.
Vos esperam nombroses lo 3 de febrièr a 14h30 a Tolosa (Alèa del President Franklin Roosevelt, estacion de mètro Joan Jaurés) e a Montpelhièr (Plaça de la Comèdia) !
Lo Collectiu Occitan (Convergéncia Occitana, CREO, Confederacion Calandreta, Partit Occitan, EELV Occitania, País Nòstre, Partit de la Nacion Occitana, Esquèrra Revolucionari Occitana, Bastir, Macarèl, Associacion Zo).