Los organizators del Forum occitan dich La Dintrada, que se debana cada an dempuèi qualques temps al mes de setembre e que se vòl luòc de reflexion sus l'occitanisme, comunican sus çò que preveson per 2018.
D'en primièr la data. Lo forum, que se vòl ciutadan, pausarà las siás valisas a Tolosa lo 22 de setembre.
Quinas seràn las tematicas ?
Lo comitat de pilotage anóncia una manifestacion un pauc diferenta de l’an passat.
Lo matin serà propausat un estat dels luòcs d’Occitània region per region. La tòca es de tornar balha a la reflexion se dimension panoccitana e de metre en evidéncia çò que fonciona o pas.
Per cada region, de personalitats faràn un bilanç que cobrirà totas las tematicas que pertòcan los ciutadans occitanistas : ensenhament de la lenga, mèdias, cultura, democracia. En mai, un convidat europèu pausarà son agach sus la situacion nòstra en comparason amb çò que se passa dins son país e pertot en Euròpa. Un debat seguirà aquelas presentacions per completar o precisar las causas. Aurèm aital en fin de matinada un panorama pro complet de l’espandi occitan, de sas fòrças e de sas flaquesas.
L’après-dinnada promet d'èsser mai ofensiva amb dos grands talhièrs que se debanaràn en parallèl. Los participants deuràn causir entre los dos questionaments propausats : « Una granda manif ? » o « Una novèla organizacion politica ? ». De personalitats seràn convidadas per s'exprimir sus cada problematica, e d’activitats en pichons grops seràn propausadas...
Per clavar la jornada, una plenièra permetrà de far un bilanç de cada talhièr, e serà seguida d’un escambi que se perlongarà a l'aperitiu !
Los membres del comitat de pilotatge son : Brunò Cecillon, Uc Jourde, Esther Mimart-Rangel, Gisèla Naconaski.