Lo Collectiu Occitan que s'es montat a la fin de 2017 per demandar mai
d'occitan a la television, contunha de mobilizar e de sensibilizar lo mond
e, notadament, los municipis de las comunas d'Occitània que son
encoratjats a manifestar lor sosten via la signatura d'una motion en
favor de l'occitan sus França 3.
Joan-Loís Blenet, membre del Collectiu, comunica (junh de 2018) :
« L'accion per l'engajament de las comunas se lança plan. Avèm ja mai de 50 comunas qu'an votadas, e per mai de 100 autras es endralhat.
« Atal sèm ja a mai de 150 comunas e ne sèm qu'a la debuta. Anam contunhar de butar per ne ganhar lo mai possible.
« Una accion collectiva plan menada nos podrià menar alentorn de 1000 comunas. Aquò nos permetrà de se faire entendre e escotar dins lo debat parlamentari de la lei de l'audiovisual.
« L'interés es tanben de mobilizar los elegits de basa e la comunas per la lenga e aquò nos servirà plan dins l'avenidor. »
Lo Collectiu demanda que França 3 venga una vertadièra cadena regionala a vocacion generalista e que posca menajar entre 80 e 90 % de la grasilha dels programas.
Vòlon que siá una vertadièra television publica regionala e que i aja cada jorn de programas en occitan.
Los animators del Collectiu organizan per aquò d'aperitus revendicatius a Nimes, Rodés, Carcassona, Montpelhièr o Tolosa.