Après las accions del 6 de junh de 2018 davant los locals de França Television a Nimes, Montpelhièr, Rodés, Carcassona, Tolosa e Albi, Joan-Lois Blenet per lo Collectiu Occitan far lo punt.

Una accion que pòrta fruchas

Los aperitus-revindicatius del Collectiu Occitan èran pensats per marcar simbolicament la continuitat de l'accion entamenada lo 8 de novembre passat e qu'a decidida d'èstre capuda illustrant lo provèrbi clapassièr :

Val mai levar lo coide
Que de tombar los braces

Rementam que s'agis d'obténer una preséncia renforçada e quotidiana de l'occitan a França 3 coma dins las ràdios publicas localas e que França 3 vengue una vertadièra cadena publica regionala.

Fin finala la data del 6 de junh es estada ben astrugada que tombèt dos jorns aprèp lo discors de la ministra per lançar la refòrma de l'audiovisual public.

Nos dona rason en afortissent

  • que i a una demanda pel regional,
  • que i a audiença.

Aquò nos confòrta per demandar que França 3 siá non pas una cadena nacionala a vocacion regionala, mas una vertadièra cadena regionala a vocacion generalista e que manege entre 80 e 90 % de la grasilha de programas.

I aguèt 6 aperitius dins 6 vilas : Nimes, Montpelhièr, Rodés, Carcassona, Tolosa e Albi amb un punhat de valents, e aquò al metèis moment.

L'acuèlh de France 3 es estat plan coral e an fach resson de nòstras accions dins los jornals de Montpelhièr e Tolosa.

Avèm rescontrat gaireben pertot los responsables e a Tolosa lo director Carlos Belinchon e la directora dels programas Laure Cornejo venguèron beure e charrar longament.

Podèm ja afortir que i a aurà una melhora preséncia de l'occitan a França 3 Occitània e que de tancatges son a se levar.

Aquò nos confòrta per contunhar l'accion d'autant mai que per la refòrma i aurà consultacions tant del governament que pels parlamentaris. Ja una reünion es prevista amb lo cabinet de la ministra.

Comptam tanben amb lo sosten de las comunas que jògan plan lo jòc.

Tot aquò serà utile per la socializacion de l'occitan, sa visibilitat e la produccion audiovisuala dins la nòstra lenga.

Joan-Lois Blenet per lo Collectiu Occitan.