Agregacion d'occitan per l'an que ven. La FELCO comunica.
Pas d’occitan a la session 2019 de l’agregacion
de las lengas de França
La novèla es tombada en fin d’aqueste dimècres [11 de julhet de 2018], a la chut-chut, amb la publicacion dels programas : a la session 2019 i aurà lo basc, lo catalan e lo còrse.
Per lo burèu de la FELCO, es pas estada una suspresa totala lo bruch corrissiá que i auriá en 2019 una session per lo basc e lo catalan qu’èran pas concernits en 2018 e qu’una sola de las 3 lengas de la session 2018 (breton, còrse, occitan) demorariá. Es per aquò que tot en denonciant l’escandal del pòste unic per 2018, avèm pas quitat de nos mobilizar (audiéncias e letras al Ministèri), letra als elegits (la darrièra d’aqueste 8 de julhet) per obténer una session 2019 amb un nombre decent de pòstes. Amb d’arguments multiples :
- lo nombre de departaments de l’espaci occitan ;
- lo nombre important de marcats a la session 2018 ;
- lo nombre important de presents a l’escrich ;
- los excellents resultats obtenguts per los candidats que capitèron pas lo concors estent lo gaire de pòstes.
Demorèt sord e mut lo Ministèri ! E nosautres, emai o aguèssem envisatjat, avèm presa la novèla en plen morre :
- mesprètz dels candidats de la session 2018 qu’aurián pogut, sus la lançada, reinvestir lo trabalh de preparacion ;
- mesprètz dels formators que s’èran implicats dins de condicions dificilas per preparar del melhor los candidats ;
- mesprètz de las Universitats de Tolosa e Montpelhièr qu’avián meses de mejans per aquò : oras pagadas per lo montatge administratiu e pedagogic, las sesilhas de formacion, las jornadas d’estudi, los seminaris, la correccion de devers, l’organizacion d’espròvas blancas…
Ajustarem, dins l’encastre de la convencion de partenariat que religa l’Universitat Paul Valéry amb lo CIRDÒC, la mesa a disposicion d’un espace mutualizat de liure accès per totas las lengas de França, ont èra depausadas de ressorsas per preparar l’espròva comuna, porgidas per de collègas de mantuna lenga regionala…
Ajustarem lo biais de temptar la division entre lengas alara que totes los universitaris de la jurada de l’agregacion de lengas de França avián signada una mocion per demandar que totas las lengas sián concernidas per la session 2019, alara que los membres de la seccion 73 del conselh nacional de las Universitats avián demandada la mema causa.
D’alhors sa temptativa es vana : avèm recebut un messatge del consehièr Saveriu Luciani al nom de la Collectivitat Territoriala de Corsega que ne reprenèm aquí un extrach :
« Je tiens à vous faire savoir ma déception quant au prochain concours externe de l’agrégation. Ma stupéfaction a été grande de constater le tri cynique dont avaient fait l’objet les langues choisies pour le premier concours. A mes yeux, toutes doivent bénéficier du recrutement d’au moins un lauréat par an. Cela ne me semble pas négociable et nous avons intérêt à signifier notre solidarité face à un gouvernement dont les choix ne laissent pas de surprendre et le cynisme de confondre et d’atterrer. Soyez assuré de ma solidarité, à travers ma voix de celle du Conseil exécutif et, plus largement, du peuple corse qu’il représente démocratiquement. »
Per la FELCO, es pas question de se calar. Tre coneguda la novèla, lo burèu a escrich als parlamentaris occitans e bretons. Vos demandam de relaiar, lèu-lèu, abans la fin de la session parlamentària, aquela letra pròche dels parlamentaris de vòstre departament. Avèm escrich al Ministre. Avèm tanben escrich als sindicats e vos demandam de far seguir dins lo vòstre : li podètz mandar la letra al Ministre per informacion.
La FELCO lo 14 de julhet de 2018