Julhet de 2018. Dins un article, 2018 : l’Òc dins la tempesta, publicat sul site consacrat al forum occitan La Dintrada, Uc Jourde torna rapelar la marrida situacion dins la quala se tròba actualament l'occitanisme.

En conclusion tot en rapelant l'eveniment previst a Tolosa lo 22 de setembre escriu :

« Per se renovelar l’occitanisme deu comprene sa granda diversitat e far de prepausicions novèlas que porián aportar d'avançadas per totas las categorias : professionals, associatius, ensenhaires, etc. Avèm en realitat un fum de possibilitats, mas passam a costat !

« Es per aquela rason que prepausam una edicion novèla de « La Dintrada », lo forum ciutadan occitan.

« Dins una jornada aurèm un estat dels luòcs region per region (per de personalitats convidadas), puèi ensajarem de definir ensemble d’objectius e perque pas d’accions novèlas. De que volèm per 2030 ?

« Vos prepausam de venir a Tolosa per l’edicion 2018 de La Dintrada : ensemble trobarem las responsas ! »

[Legir l'article sus ladintrada.eu]

La succès del forum de 2017 a Narbona decidiguèt los organizators a ne tornar preparar un.

Preveson lo matin del 22 de far un punt sus la situacion per cadunas de las regions occitanas. De personalitats implicadas al quotidian faràn un bilanç sus de tematicas divèrsas : ensenhament, mèdias, cultura... Un debat seguirà aquelas presentacions.

Dins l’après-dinnada dos grands talhièrs seràn organizats Los participants deuràn causir entre los dos questionaments propausats : « Una granda manif ? » o « Una novèla organizacion politica ? ».

En fin de jornada una plenièra permetrà de far lo bilanç de cada talhièr.

L'objectiu del Forum Occitan es de far lo punt sus las accions menadas pels actors del movement e de menar d'idèas.

En 2017 segon los organizators la manifestacion mobilizèt 80 participants per 13 intervenents (7 femnas e 6 òmes) ; 6 jornalistas èran presents per animar los debats e raportar las conclusions dels talhièrs ; 10 benevòls e un salariat de mièg temps an participat a l'organizacion.

Suls malhums social, e totjorn segon los organizators, l'eveniment comptabilizèt 2 500 vistas sus Facebook et 15 000 vistas sus Twitter.

la dintrada