Creacion d'un pòl cultural occitan. Novembre de 2018 la comuna de Narbona dins sa revista comunica :
Pòl cultural occitan a venir : « una sinergia entre las generacions »
Dins l’anciana casèrna Montmorency, aquesta estructura aculhirà d’associacions occitanas, en particular una calandreta.
Acampar dins un meteis luòc totes los actors locals del mond occitan : aquí l’ambicion de l’associacion Bastissem Occitan Narbones, que s’es lançada dins la creacion d’un pòl cultural occitan : « A l’ora d’ara, pauc de ligams existisson entre los aderents de las escolas Calandreta de Narbona e las autras associacions localas, çò regreta sa presidenta Anne-Sophie Castan. Pr’aquò, aquesta estructura novèla permetrà de desvolopar una sinergia novèla entre las generacions diferentas dins lo mond occitan. »
Engatjada en favor de las culturas regionalas, la comuna concediguèt de bastiments de l’anciana casèrna Montmorency, per un balh enfiteotic. Lo pòl desvoloparà aital un molon d’activitats centradas a l’entorn de l’ensenhament e la cultura, en prepausant d’activitas de teatre, d’escritura e d’expression, de mòstras, d’espòrt (tambornet)…
Aculhirà tanben lo transferiment de la Calandreta La Jaquetona, que fa cap a una demanda fòrta. Aquesta estructura poirà aculhir aital un centenat d’escolans, contra cinquanta actualament. La dobertura es prevista en 2019.
La comuna, primièr partenari
La comuna signèt un balh enfiteotic de 30 ans amb l’associacion Bastissem Occitan Narbones. Contra un èuro simbolic per an, aquesta pòt ocupar los locals de l’anciana casèrna Montmorency. A carga per ela de los amainatjar : prevei un budgèt de 500 000 èuros.
Per l’ajudar dins aqueste envestiment, la comuna votèt una subvencion de 120 000 èuros e la garantida d’un prèst a la nautor de 100 000 èuros.