En seguida de las decisions presas per lo Ministèri de l'Educacion Nacionala contra l'ensehament de la lenga occitana en region Occitània, lo Centre Regional dels Ensenhaires d’Occitan de Tolosa (CREO Tolosa) amb lo sosten de la FELCO e de las escòlas Calandretas apela a manifestar a Tolosa lo 17 de febrièr a 14h, plaça del Capitòli.
Pas d’Occitània sens l’occitan
Lo ministre de l’educacion nacionala, J.-M. Blanquer, e lo rectorat de Tolosa an decidit de copar l’ensenhament de l’occitan :
- al nivèl nacional, suprimisson tot interès per l’occitan al bac e empachan l’occitan d’accedir al meteis estatut avantatjós que l’opcion latin-grèc ;
- al nivèl academic, suprimisson los mejans donats abans als establiments per l’occitan. Fauta de mejans sufisents, plan pauc de corses se mantendràn.
Las decisions de l’Estat son en contradiccion amb de nombroses engatjaments qu’a preses amb las collectivitats localas. França se plaça dins l’illegalitat en escarnissent lo còdi de l’educacion e tanben la Constitucion de la republica.
L’occitan es un dels elements fondadors de l’identitat de nòstra region. Per plan conéisser e comprene nòstres territòris, podèm pas ignorar la lenga e la cultura millenàrias que pòrtan. Doblidar l’occitan es pas un signe de modernitat, mas una pèrda de substància.
Dempuèi mai de 40 ans, las pòrtas dels establiments escolars de l’acadèmia de Tolosa se son pauc a pauc dubèrtas a l’ensenhament de l’occitan dins l’encastre d’una continuitat de remarcar.
Fàcia a la regression plan violenta en camin, lo Centre Regional dels Ensenhaires d’Occitan de Tolosa (CREO), la FELCO, l’IEO, las Calandretas, Convergéncia Occitana e d’autras associacions occitanas apèlan massissament totas las e totes los que son estacats coma eles al respècte de la diversitat culturala e lingüistica de nòstres territòris, a una politica volontarista e ambiciosa per l’occitan e a son plen desvolopament dintre l’escòla, a manifestar :
Dimenge 17 de febrièr de 2019, 14h, a Tolosa, Plaça del Capitòli.
Sorsa : site FELCO