Un collectiu de companhiás de teatre que jògan en lengas autoctònas vengudas minoritàrias, ven de se crear. L'oficializacion d'aquesta estructura se faguèt a Rodés pendent l'Estivada de 2019.
Baptesada lo CTLA per Collectiu dels Teatres en Lengas Autoctònas vòl respondre a l’estat d’urgéncia ont se tròban las companhiás qu'emplega aquelas lengas sul territòri francés.
Son representadas las lengas : còrsa, occitana, bretona, basca, catalana, alsaciana.
Comunicat del CTLA
Aquest 9 d’agost sarà per l’UNÈSCO « Jornada Internacionala dels Pòbles Autoctòns ».
De mai, al mes de genièr, l’Amassada Generala de l’ONU proclamava 2019 « Annada de las Lengas Autoctònas ».
L’autoctonia concernís França tota e pas sonque sas possessions alunhadas.
Las lengas dichas « regionalas » son las lengas autoctònas d’una bèla part de l’espaci metropolitan de la nòstra Republica.
Los 18 e 19 de julh de 2019, dins l’encastre del festenal L’Estivada portat per la vila de Rodés, lo primièr rescontre dels teatres en lengas regionalas a permés de fondar un collectiu, lo CTLA : Collectiu dels Teatres en Lengas Autoctònas.
Aquesta acampada es una primièra e fuguèt organizada per respondre a l’estat d’urgéncia ont se trapan aqueles teatres a l’ora d’ara.
Las companhiás d’aquestes teatres son d’actors dels terraires e òbran per faire tindar lor creativitat dins lors lengas maltractadas.
L’objectiu es de se ganhar lor plaça legitima dins lo païsatge artistic, cultural, audiovisual e institucional francés.
I a un besonh, una realitat, una demanda sociala e aquestas companhiás se recampan per obténer un avenidor per la creacion dins las lengas autoctònas del nòstre país.
Lo CTLA