Las regions Occitània e Nòva Aquitània propausan als estudiants que se destinan al mestièr d'ensenhaire un borsa dicha « ensenhar ». Dins son edicion del mes de setembre e d'octobre de 2019 lo magazine de la region Occitània presentava aquela ajuda.
Un a lenga e un mestièr amb la borsa « ensenhar »
L’OPLO (Ofici Public de la Lenga Occitana) es un establiment public que, desempuèi 2016, recampa l’Estat e las doas regions Nòva Aquitània e Occitània-Pirenèus-Mediterranèa e qu’a per tòca la promocion de l’occitan, son ensenhament, sa transmission e son desvolopament.
Es dins aquela amira que creèt la borsa « ensenhar » a destinacion dels estudiants que seguisson una formacion universitària per se preparar al mestièr d’ensenhaire dins lo primièr grat (escòla mairala e elementària). Una ajuda de 8 000 èuros es aital possibla pels candidats (amb un finançament de 4 000 èuros per annada de formacion, accessible en Licència 3 e/o en Master 1).
Aquela borsa s’adreiça a totas las e totes los que son dins un projècte professional per rejonhe lo malhum de las escòlas bilingüas publicas occitanas o de las escòlas associativas de Calandreta ; concernís las Acadèmias de Bordèu, Lemòtges, Montpelhièr, Peitius e Tolosa, donc un espandi larg que de l’ocean a Mediterranèa abraça una granda part de l’espandi d’òc dins sa diversitat e son unitat.
Los estudiants interessats son convidats a despausar un dorsièr de candidatura alprèp de l’Ofici Public de la Lenga Occitana. Las condicions d’eligibilitat e totas las entresenhas necessàrias se retròban sul site de l'OPLO.