Lo dimècres 29 de genièr de 2025 Ursula von der Leyen presidenta de la Comission Europèa presentèt de solucions per renforçar la competitivitat de l'Union.
Euròpa demòra una de las regions mai dinamica del mond, pr'aquò es confrontada dempuèi qualques ans a d'empachas màger coma la guèrra menada per Russia en Ucraïna, lo cambiament climatic o l'arrivada de las intelligéncias artificialas. Aqueles cambiaments modifican lo mond e necessitan de s'adaptar.
Ursula von der Leyen desvelèt un plan que deu permetre de :
- simplificar las règlas per las entrepresas ;
- limitar las barraduras al dintre del mercat unic qu'empachan lo desvolopament del comèrci ;
- liberar de capitals per las entrepresas per permetre un melhor finançament de l'inovacion ;
- solucionar los problèmas ligats a las mancas de competéncias ;
- melhor coordonar las politicas de l'Union e las dels Estats.
Es lo motor Europèu de l'inovacion que deu èsser, segon la presidenta de la Comission, reactivat, per permetre a las entrepresas de demorar competitivas. Los domènis en jòc son nombroses : intelligéncia artificiala, biotèc, calcul qüantic, tecnologias espacialas, numeric, robotica.
Lo plan prevei de garentir l'independéncia energetica de l'Union e de redusir los còstes de l'energia.
Lo calendièr prevei de metre en plaça las accions necitas sus las annadas que venon, de 2025 a 2026.
La presentacion de çò que la comission nomma una Bossòla de Competitivitat (Competitiveness Compass) seguís la publicacion del Rapòrt Draghi de 2023 que fasiá un constat alarmant. Segon Mario Draghi, Euròpa èra a pèrdre en competitivitat, augmentava sa dependéncia energetica, comolava los retards tecnologics e non mestrejava pas sa seguretat.
La Bossòla de Competitivitat