Congrès permanent de la lenga Occitana - L'In-Òc comunica : "Lo 16 de deceme 2011 a 14h, a l'Ostau de Region de Bordèu, M. David Grosclaude, conselhèr regionau d’Aquitània, delegat a las lengas e culturas regionaus, qu'a lançat oficiaument lo navèth organisme de regulacion de l'occitan : "Lo congrès permanent de la lenga occitana" en preséncia de representants de las Regions Mieidia Pirenèus, Lengadòc-Rosselhon e Ròse-Aups, deu Ministèri de la cultura e de la comunicacion (D.G.L.F.L.F.) e de Francés Boya Alós - senator espanhòu e ancian sindic d'Aran - e d'Andres Urrutia - president d'Euskaltzaindia Academia reiau de la lenga basca.
"Lo congrès permanent de la lenga occitana qu'ei ua navèra institucion scientifica e morau independenta qui representa los usatgèrs e locutors de l'occitan-aperat tanben lenga d'Òc.
"Lo congrès qu'a per mejan d'accion la produccion d'utís lingüistics de referéncia (diccionaris, lexics, gramaticas, etc...), la regulacion lingüistica (preconizacions) e la recèrca scientifica aplicada. Que hè segon los principis d'accions com lo respècte de l'unitat e de la diversitat de l'occitan, l'estabilitat, la representativitat de las regions lingüisticas deu territòri d'Òc, la collegialitat e la confidencialitat de las decisions, e la difusion de l'informacion.
"Qu'ei l'arribada en cap de tribalhs miat per l'A.P.O.R.L.OC.- Associacion de prefiguracion de l'organisme de regulacion de la lenga d'Òc- a comptar de visitas de l'Institut d'Estudis Catalans, d’Euskaltzaindia - Academia Reiau de la lenga basca, de la Fryske Akademy e de personas qualificadas e d'usatgèrs.
"Lo Congrès permanent de la lenga occitana qu'amassa las institucions e las federacions istoricas de regulacion de la lenga occitana sus tres Estat de l'Union Europèa (França, Espanha, e Itàlia). L'Estat (Ministèri de la Cultura e de la Comunicacion – D.G.L.F.F.) e las collectivitats territoriaus (Region Aquitània, Mieidia-Pirenèus, Lengadòc-Rosselhon e Ròse-Aups) qui la sostienen, que participan a las soas instàncias au títol de membres consultatius.
"L'institucion qu'ei constituida d'ua associacion gestionària sostienuda per dus Conselhs assessors : lo Conselh lingüistic e lo Conselh deus usatgèrs. Entà poder respóner a las hrèitas mei urgentas deu public, mantuas òbras que son dejà aviadas, dens las quaus la creacion d'un diccionari elementari francés-occitan en linha."
Ligam