En seguida de la votacion del 25/05/2014 per l'eleccion dels deputats europèus, Martina Gròs e Geli Grande, membres de la lista Occitània per una Euròpa dels Pòbles, comunican :
"Grandmercés
"Martina Gròs e los de la lista Occitània per una Euròpa dels Pòbles, sostenguda pel Partit de la Nacion Occitana (PNO), grandmercejan las electrises e los electors dels 18 departaments de la circonscripcion Sud-Oèst que nos faguèron fisança lo 25 de mai de 2014.
"878 voses ! De segur la resulta es de las magrinèlas, mas es a la pagèla dels mejans umans e financièrs que la lista aviá a posita per aquesta campanha de las eleccions europèas.
"Malgrat tot aquò contunharem dins los meses e las annadas que venon de portar l’esperança d’una Euròpa de totes los pòbles qu’Occitània, lo Bascoat, Catalonha e d’autras nacions sens estat i seràn vertadièrament representadas.
"La nòstra preséncia a dobèrt una via d’esperança pel pòble occitan. Deman aquel d’aquí serà mai fòrt se las fòrças democraticas que lo compausan se sabon unir per çò essencial. Las nòstras divisions fan lo jòc de París."
Martina Gròs
Geli Grande
Lo 27 de mai de 2014