albi-sociolinguistica-2016Lo dissabte 15 d'octobre de 2016 se debanèt a Albi lo collòqui : Una politica sociolingüistica per l'occitan, las governanças en question.

L'objectiu del collòqui èra d'estudiar los mejans de desvolopament d’una politica sociolingüistica en Occitània en favor de l’occitan, per permetre la subrevida e lo desvolopament de l'usatge de la lenga, que dempuèi vint ans los locutors primaris son a desaparéisser, la transmission familiala es interrompuda.

Los organizators tornan rapelar qu'una presa de consciéncia d'una part significativa de la populacion en favor de la lenga e de la cultura occitana es a se far. En consequéncia las collectivitats començan de desvolopar de politicas publicas. Son aquelas politicas que cal pensar, promòure, ajudar.

Es la dinamica entre usatgièrs de la lenga, associacions representativas, operators de mediacion culturala e poders publics que lo collòqui se propausavan d'estudiar. De fach es tota l'interfàcia entre las associacions e los poders publics qu'es de tornar veire.

Ja en 2013 jos la presidéncia d’Éric Forgues, director de l’Institut Canadian de Recèrca de las Minoritats Lingüisticas, ICRM, un primièr collòqui deviá permetre, en considerant l’avança incontestabla de Canadà en matèria de politica sociolingüistica, de tornar véser las estrategias mesas en plaça per l’occitan e de ne concebre de nòvas ; d'ajudar los actors, institucions e collectivitats pertocadas per la lenga occitana, a elaborar d’estrategias collectivas per tal de menar d’accions qu’asseguraràn la vitalitat de la lenga occitana deman. Miquèl Taiac actor de l'occitanisme en albigés ne rendiá compte [ligam].

Los cambiaments regionals actuals (naissença de la novèla region Occitània en 2016) mas tanben la mesa en plaça de l’Ofici public de la lenga occitana, l'OPLO en 2015, son de rasons màger que butan los actors del moviment cultural occitan a aprigondir lors accions, per poder melhor agir.