Dassault Aviation e OHB an anonciat lo diluns 11 de mai de 2026 que s'associavan per prepausar a l'Agéncia Espaciala Europèa (ESA) un avion espacial polivalent Vortex-S, capable de transportar de merças cap a d'estacions espacialas e d'efectuar de missions autonòmas en orbita.
De discussions son en cors amb d'autras grandas entrepresas espacialas europèas per permetre a Euròpa d'abançar dins la mobilitat espaciala.
« Amb lo Vortex-S prepausat a l'ESA, volèm afortir las capacitats espacialas d'Euròpa. Los nòstres amics alemands d'OHB son de partenaris naturals per participar a aquel projècte, en portant lor expertisa remarcabla. Sèm fòrça contents d'aquela collaboracion, que promet d'èsser fòrça fructuosa » çò diguèt Eric Trappier, CEO de Dassault Aviation.
« Vortex-S per l'ESA es una iniciativa ambiciosa impulsada pel besonh d'aver de capacitats europèas de transpòrt espacial autonòm. Coma una de las principalas entrepresas espacialas d'Euròpa, lo domeni orbital es nòstre camp de jòc natural. Lo partenariat amb Dassault Aviation es natural : coma entrepresas de nauta tecnologia de proprietat familiala, partejam la meteissa vision e pòrtam la meteissa fòrça complementària al desvolopament d'un avion espacial que se pòt reutilizar, Dassault Aviation coma fabricant d'avions e OHB coma entrepresa espaciala » çò diguèt Marco Fuchs, CEO d'OHB.
