Los lògos dels quatres Oficis publics francés de las lengas
Lo dijòus 22 d'avril de 2021 un recors es estat depausat al conselh constitucional al subjècte de la lei Molac. En seguida los quatres Oficis publics de las lengas (occitana, basca, catalana e bretona) comunicavan.
Comunicat de premsa del 27 d’abril de 2021 dels Oficis publics per las lengas
Nosautres, Presidentas e President dels Oficis publics de las lengas basca, bretona, catalana e occitana, nos impòrta fòrça d’exprimir amassa la nòstra decepcion, la nòstra incompreension e lo nòstre desplasèr davant la sasina del Conselh Constitucional sus la lei Molac relativa a la proteccion de las lengas regionalas e a la lor promocion.
Dempuèi d'annadas, la construccion de las politicas publicas en favor de las lengas regionalas e l’accion dels actors de terren se tustan a un quadre juridic pro clavat e a de trabucs e empachas nombroses e recurrents en mantuns domenis.
Rapòrt a aquò, la lei Molac pòrta un quadre legal que permet de securizar de practicas larjament espandidas suls nòstres territòris e d’anar cap a un desvolopament facilitat e perenne. Es estada escricha e portada dins un esperit de construccion d’un consensus larg que lo vòte majoritari del 8 d’abril passat a clarament confirmat.
Lo recors davant lo Conselh Constitucional fach per 61 deputats aquel 22 d’abril, va al contra d’aquel consensus, es de regretar e de deplorar.
Esperam una eissida positiva, e demoram determinat a obrar per far abotir un quadre legal facilitator e rassegurant, que permeta l’espandiment d’una politica publica volontarista respondent a una demanda sociala e a un consensus societal, politic e institucional que contunharem a promòure e acompanhar.
Charline CLAVEAU – Presidenta de l’Ofici public de la lenga occitana, Conselhièra regionala delegada de Novèla-Aquitània.
Antton CURUTCHARRY – President de l’Ofici public de la lenga basca, Vice-president de la Comunautat d’aglomeracion País-Basc.
Carole DELGA – Presidenta de l’Ofici public de la lenga catalana, Presidenta de la Region Occitània Pirenèus-Mediterranèa.
Lena LOUARN – Presidenta de l’Ofici public de la lenga bretona, Vice-Presidenta de la Region Bretanha.