Lo 20 d'avril de 2022 abans lo segont torn, lo Partit de la Nacion Occitana (PNO) comunicava sus las eleccions presidencialas en França.

Lo Partit de la Nacion Occitana e lo segond torn de l’eleccion presidenciala francesa

Lo Partit de la Nacion Occitana dona pas de consignas de vòte per lo segond torn de l’eleccion presidenciala mas propausa d’elements de reflexion per guidar los electors e electrises occitans.

Quin es lo bilanç del president sortent Emmanuel Macron ?

S’es pas simplificat lo milafuèlhas territorial, las grandas regions infòrmas que devèm a François Hollande son totjorn de nans polítics sens poders reals.

Macron a mantengut lo referendum d'autodeterminacion en Canaquia per que demòre al sen de França malgrat lo boicòt dels Canacs.

A pas porgit cap d’avançada institucionala a Corsega.

Coma un bon jacobin e imperialista francés, a sostengut Espanha dins sa repression de l'independentisme catalan.

A favorizat la Francofonia i a pas res fach per establir la diversitat lingüistica en França.

A pas ensajat de resòlver lo problèma de la fractura territoriala revelada per los "gilets jaunes".

A gerit la pandemia de manièra autoritària.

S’es pas atacat amb eficacitat a dos problèmas que preocupan nòstres conciutadans : l’immigracion incontrolada e l’integracion de las populacions d'origina immigrada.

Aquel bilanç negatiu justifica la causida de votar pas per el exceptat en fauta d’alternativa per evitar lo pièger, es a dire, l'eleccion de Marine Le Pen.

Pasmens, votar per Macron es una causida respectabla.

Lo Partit de la Nacion Occitana rapèla que Marine le Pen es totjorn una ultrajacobina, enemiga de la diversitat lingüistica, imperialista francesa, ostila a l'autonomia de Corsega, propausant de suprimir las regions e adèpta de la "preferéncia nacionala".

Sens anar fins al Frexit e a la sortida de l’euro, son eleccion e sa simpatia pels regims autoritaris fascistas de l’Union Europèa e son admiracion per la Russia de Putin, provocarián una crisi grèva e benlèu un espetament de l’Union encara que siá pas segur que dispausariá d’una majoritat al Parlament per aplicar un programa demagogic, subretot a nivèl economic.

Lo Partit de la Nacion Occitana crei que seriá desrasonable e perilhós de votar per ela encara que comprenga la colèra contra Macron e la volontat dels estatjants de la "França de debàs" de se desfar d’el a tot pèrdre en votant per ela.

Los que refusan la causida entre lo mens pièger e lo pièger, pòdon utilisar lo vòte blanc o nul, onorable en se, mas sens influéncia sul resultat de l’eleccion.

Demòra l'abstencion, justificabla tanben quand la causida n’es pas vertadièrament una, ja que los Occitans e los autres pòbles de França an pas pas cap de reconeissença institucionala e donc cap de libertat de decision.

Lo Partit de la Nacion Occitana, un còp passada l’eleccion presidenciala, crida per que i aja un maximum de candidaturas dels representants dels pòbles de França a las eleccions legislatives de junh per far entendre lor paraula, absenta de la campanha per l’eleccions presidenciala, e s’inscriure dins lo païsatge politic.

Lo Partit de la Nacion Occitana (20/04/2022)