Lo 27 de novembre de 2024 la Region Occitània publicava sus son site un article en occitan al subjècte del plan Cultura Viva qu'a per objectiu de promòure l'emplec de las lengas occitana e catalana sul territóri de la Region. Lengas que segon la denominacion emplegada dins l'article considèron coma « regionalas », tornant prene la denominacion emplegada per las institucions francesas. Es de notar tanben qu'emplegan la denominacion Occitània per designar la Region Occitània, l'entitat administrativa.
En Occitània, las lengas regionalas balhan de votz !
En Occitània, los abitants son plan estacats a las lengas regionalas1, consideradas coma los sòcles de l’identitat regionala. Pel plan Cultura Viva, fruch d’una larja concertacion ciutadana qu’a mobilizat près de 4 000 participants, la Region s’es engatjada en 2022 a augmentar lo nombre de locutors, e a far irradiar l’occitan e lo catalan sus tot lo territòri.
« Lo Plan Parlem una cultura viva afortís nòstre engatjament a l’entorn de la promocion e la valorizacion de las lengas regionalas, e desvolopa lor usatge dins l’ensemble de las politicas regionalas. »
Carole Delga, presidenta de la Region Occitània
Adoptat en decembre de 2022, lo plan Parlem una Cultura Viva balha un vam novèl a la valorizacion e a la promocion de l’occitan e del catalan. De nombrosas accions son en òbra sus tot lo territòri. Descobrissètz-los !
Aprene l’occitan e lo catalan tre l’edat mai jova
Amb un budgèt de 4,4 M€, « Occitània es demest las regions mai volontaristas sus la valorizacion de las lengas », se regaudís Benjamin Assié, conselhièr regional delegat a las politicas lingüisticas.
Demest los engatjaments del plan Cultura Viva, l’augmentacion del nombre de classas bilingüas dins los establiments escolars. L’annada 2023 es estada marcada per una informacion melhora dels joves suls mercats e los mestièrs en ligam amb las lengas regionalas (rubrica dedicada sus loRdi dels liceans, preséncia dels oficis de promocion de las lengas regionalas2 als salons ID Mestièrs...), mas egalament una sensibilizacion dels elegits locals per levar los blocatges a l’obertura de cursus bilingües.
Los retorns son positius : sèt seccions son estadas creadas en 2023, e de novèlas oberturas son previstas en 2024 e 2025. Una cinquantena de projèctes d’educacion artistica e culturala en occitan e en catalan an egalament tocat près de 1 800 escolans en 2023, de la mairala al licèu.
En parallèl, Occitània ajuda los estudiants e los ensenhaires a se formar per respondre a la demanda d’obertura de las classas bilingüas e de las calandretas, gràcias a las borsas « ensenhar »3.
Las lengas regionalas al quotidian
Tre la mesa en plaça del plan Cultura Viva en 2022, de novèlas senhaleticas bilingüas an espelit suls espacis publics : afichatge francés/occitan dins la Maison de ma Region e la Gara de Fijac (Òlt), e desplegament de las anóncias sonòras trilingüas a bòrd dels trens en associacion amb la SNCF (linhas Pòrt-Bou/Salses-lo-Castèl en francés- catalan e Tolosa/Aush en francés-occitan). Lo trabalh se perseguís dins las garas per integrar las lengas regionalas suls panèls d’informacions als viatjaires.
La Region renovèla d’un autre costat cada an son supòrt a las accions que fan irradiar la diversitat culturala e lingüistica al prèp del public, a l’imatge de Total Festum, lo festenal de las lengas e culturas regionalas. Lo concors dels talents joves d’Occitània, lo Prèmi Nougaro, intègra egalament dempuèi 2023 las lengas regionalas coma mejans d’expression. Autra novetat impulsada pel plan Cultura Viva, un catalòg recensa los espectacles en occitan e catalan.
Enfin, costat torisme, la Region a contribuït als costats del Departament de Gèrs e de l’Ofici de torisme del Grand Aush a la creacion d’un escape game a l’entorn de la cultura occitana : Lo Baselic.
Nòtas :
1 Per 80 % dels participants a la concertacion ciutadana del plan Cultura viva, l’occitan e lo catalan representan la diversitat culturala de la region.
2 L’Ofici public de la lenga occitana (OPLO), l’Ofici Public de la Lenga Catalana (OPLC) e lo Centre internacional de recèrca e de documentacion occitanas (CIRDÒC) an per missions de desvolopar e far viure las lengas regionalas sul territòri.
3 Las borsas « ensenhar » son prepausadas per l’Ofici Public de la Lenga Occitana (OPLO), e pòdon aténher fins a 8 000 euros d’ajuda.
Sorsa de l'article : site laregion.fr