Dins son magazine del mes d'octobre e de novembre de 2016 la comuna de Tolosa presentava en occitan una entrevista Florence Salinié, fondator e cosinièr de La Topina, bar a tapàs associatiu, al còr de Tolosa ont se pòt manjar de productes locals e charrar un moment en occitan.

Dubriguèt lo 15 d’abril de 2016 a l’Ostal d’Occitània.

Planvenguts a La Topina !

Aprèp qualques meses d’existéncia, lo bilanç de la frequentacion de la Topina correspond a las espèras ?

Dempuèi qu’avèm dubèrt, avèm registrat gaireben 1 100 adesions a l’associacion, tant de mond que descubrisson l’Ostal d’Occitània coma de militants, uroses de trobar aicí un endreit ont la lenga occitana viu. D’escolans, de calandrons, passan tanben, e veson l’occitan present dins la vida vidanta, fòra de l’escòla. Sèm uroses, perqué l’evolucion per ara es aquela que desiràvem, e que la Topina capita de mesclar mond vengut per de rasons plan desparièras.

Cossí nasquèt aquesta idèa d’un bar a tapàs occitan ?

Ne parlàvem ja i a un quinzenat d’annadas entre amics. Ieu, pus tard, aguèri l’experiença de la tenguda d’un pichon restaurant en Catalonha. E fin finala lancèrem lo projècte fa dos ans, aicí. Las òbras foguèron menadas amb l’ajuda de la Comuna de Tolosa. Voliam un endreit convivial, que pòsca convenir al mond que vòlon un repais vertadièr, tant coma a los que passan lèu, per beure un còp o manjar un tròç. Las tartinas e los tapàs son la bona formula per tot aquò.

La còla de la Topina organisèt ja de seradas especialas, per la fèsta de la musica entre autres. D’autres eveniments son prevists ?

Avèm per tòca, primièr, de participar a la vida de l’Ostal d’Occitània. I a un agenda cargat aicí, entre los concèrts de la Pause Musicale que reprendràn en setembre, los temps fòrts de las associacions... Mas avèm tanben de projèctes pròpris : sèm a fargar un partenariat amb la Tuta d’Òc [espaci de difusion cultural occitan, ndlr] per far venir d’artistes al moment que sortís lor album. E puèi, sustot, a comptar de la dintrada, la Topina dubrís un jorn de mai : poiretz venir tre lo dimars, als oraris costumièrs de 10 oras a 22 oras !

La Topina bar a tapas occitan a Tolosa, del dimars al dissabte de 10 h a 22 h.
11 carrièra Malcosinat M° Esquirol