La Setmana Occitana de l’associacion Òsca, l'associacion dels estudiants occitans de l'Universitat de Tolosa Joan Jaurès (UT2J), se tendrà del 8 al 11 d’abrial 2019.

Per l'ocasion l’Universitat Joan Jaurés e lo restaurant La Topina aculhiràn conferéncias, mòstra, concèrts e divèrsas animacions amb per subjècte Leon Còrdas.

Los organizators en partenariat amb lo CLAP (Centre de ressources Lettres, Arts et Philosophie de l’UT2J), vos prepausan de tornar descobrir sa vida e sas òbras d'en primièr a travèrs la mòstra del CIRDÒC Dins las piadas de Leon Còrdas e una conferéncia de Joèla Ginestet sul poèta de Menèrba.

Es tanben al programa la projeccion del film Raices de Christian Vialaret e una conferéncia d’Aitor Carrera, de l’Universitat de Lhèida, sus la Val d’Aran.

Tota la setmana, los estudiants animaràn lo campus, amb d’animacions musicalas e los jòcs de fusta de l’associacion Vam e Nhac, e aculhiràn los estudiants de l’UdL per un escambi universitàri occitan-catalan.

De mancar pas, los concèrts del grop de ròck Courtial X Kogane a l’universitat lo dimars 9 d’abrial a 12h30, e del Duò P.A.T.O.I.S a La Topina lo dimècres 10 d’abrial.

Los estudiants de l’associacion Òsca vos convidan doncas a venir festejar amb eles aquesta Setmana Occitana 2019 !

*

Diluns 8 d’abrial

15h. Projeccion del film Raices de Christian Vialaret. Sala de formacion del CLAP (GA048).

« Dins aquela familha, Michel e Pepé aguèron pas la causida del mestièr exercit tota lor vida... Dins aquela familha, Marie e sas sòrres transmeton un saber-far tradicional d’un mond rural que desapareis... Dins aquela familha, Michel e Marie me laissèron la causida d’exercir lo mestièr que voliái, tenir una camèra, per immortalizar aquela mena de causas... »

Dimars 9 d’abrial

10h30. Conferéncia d’Aitor Carrera sus la Vall d’Aran. Sala GA062.

« Aitor Carrera es professor de lenga e de lingüistica e sòci de la Cadièra d’estudis occitanas a l’universitat de Lhèida. Sa tèsi Elements de variació diatòpica en el gascó de l’alta conca de la Garona pòrta sul gascon parlat dins la Vall d’Aran e lo Comengés. »

10h-14h. Jòcs de fusta tradicionals.

« Los jòcs de fusta de Vam e Nhac son la resulta d’una recerca sus las tradicions dels jòcs populars que se trapavan un temps dins los estanquets, las vòtas, las fèstas, las quermessas. Pauc son demorats vius en Occitánia alara que d’autras regions los an mai conservats. Totes los jòcs son pèças unicas, marcats en occitan, bastits simplament dins diferentas espècias de boès sens cap de plastic. Un catalòg presenta cada jòc en occitan e en frances : istoric, biais de jogar e règlas. »

12h30-13h30. Concèrt de Courtial X Kogane.

« CXK, es lo païsan de Roergue que canta dins lo desèrt Californian. Una guitarra, una batariá e fai tirar ! Inspirat per la musica trad’occitana, CXK posa sos riffs dins la trança d’una musica millenària per una resulta enraiçada e francament en plen morre. L’un dopat al plaser visceral de cantar dins una lenga mespresada e l’autre dins la necessitat de jogar sa vida a cada tust de bagueta, lo duò en mòde versús s’adreça al public al biais d’un ON/OFF frontal. »

Dimècres 10 d’abrial

10h-14h. Jòcs de fusta tradicionals.

19h30. Concèrt a La Topina : Duo P.A.T.O.I.S. Plaça Lange, Arche 4 du Pont Saint-Pierre.

« Duo P.A.T.O.I.S : Pichòta Associacion de Tradicion Occitana e d’Intuicions Sonòras. Lo cant e las percussions que partejan dempuèi 8 ans dins La Mal Coiffée, son las aisinas d’aqueste duò qu’aima de se noirir del repertòri occitan. Aquestes cants a dançar, a despartir, a imaginar o a transmetre, Carina Berny – cant, bombò, trompeta – e Laeticia Dutech – cant, bendir, tamborin, tòm bassa – calandrejan a ne tornar inventar l’interpretacion... e aquò’s sublime ! »

Dijòus 11 d’abrial

10h30. Conferéncia de Joèla Ginestet sus Leon Còrdas. Sala GA254.

« Joèla Ginestet foguèt professora e Mèstra de conferéncias en lenga e literatura occitanas a l’Universitat Joan-Jaurès. Nos ven presentar la vida e l’òbra del poèta occitan Leon Còrdas. »

*

Del 8 al 19 d'abrial – Mòstra Dins las piadas de Leon Còrdas del CIRDOC, en partenariat amb lo CLAP (Centre de ressorgas Letras, Arts e filosofia). Bastiment Lo Gai Saber. Al CLAP (oràris de dubertura del CLAP).

Aquela mòstra vos propausa un retorn suls grands moments e las òbras emblematicas del grand poèta de Menèrba. Fòrça conegut per sas pèças de teatre qu’an recampat de milièrs de personas a la fin del sègle XX. Leon Còrdas es tanben l’autor d’una òbra poetica remirabla e d’una antologia de poesia medievala de granda qualitat. De totas las luchas, demorarà un actor infatigable del militantisme occitan dempuèi las primièras oras de l’Institut d’Estudis Occitans après-guèrra fins a son engatjament politic dins lo Partit Occitan.

Tanben de veire la mòstra de Fanny Barrabès suls tèxtes de Claudi Marti a la BUC (UT2J). Estrena lo 14 de mai, en preséncia de Claudi Marti.