Lo 20 e 27 de junh de 2021 se debanaràn en França las eleccions regionalas e departamentalas. Per l'ocasion lo Partit de la Nacion Occitana (PNO) comunica.

Eleccions regionalas e departamentalas del 20 de junh de 2021

En Region administrativa Occitània, per la primièra votacion de las eleccions regionalas lo 20 de junh de 2021, lo Partit de la Nacion Occitana (PNO) crida clarament a votar e a far votar sens cap de retenguda per la tièra Bastir Occitània bailejada pel Jean-Luc Davezac.

Es la sola tièra vertadièrament occitanista pel sieu contengut politic, economic e cultural.

En Region Provença (ex PACA) per la primièra votacion de las eleccions regionalas lo 20 de junh de 2021, lo Partit de la Nacion Occitana (PNO) crida clarament a votar e a far votar sens cap de retenguda per la tièra Oui Provence / Òc per Provença bailejada per Hervé Guerrera del Partit Occitan.

Sus l'ensems del territòri de la nacion occitana, son las doas soletas tièras vertadièrament occitanistas per lors contenguts politics economics e culturals e dins las quinas de sòcis e de sòcias del Partit de la Nacion Occitana (PNO) son estats integrats.

Per las eleccions departamentalas, sul canton del País de Serras en Òlt e Garona, lo Partit de la Nacion Occitana sosten, lo binòme compausat d'Yves Boissière del Partit Occitan e d'Élise Igounet. Suls autres departaments occitans, sosten los binòmes que prenon d’empenhaments fòrts per la promocion de la lenga e de la cultura occitanas.

Votatz intelligent votatz OCCITAN.

Lo PNO, junh de 2021