A la debuta del mes de julhet de 2023 lo Parlament Europèu votèt per l'adopcion de règlas novèlas per fin de far créisser lo nombre de las estacions que permeton de recargar los veïculs electrics. Las novèlas disposicions preveson tanben de ne facilitar l'usatge.
Aquelas leis fan part del paquet legislatiu Fit for 55 en 2030, lo plan de l'Union Europèa per redusir d'almens 55 % las emissions dels gases que contribuïsson al rescalfament climatic (rapòrt a las emissions de 1990).
Los deputats an decidit que d'estacions d'una poténcias de mai de 400 kW per las veituras deuràn èsser desplegadas almens totes los 60 km sus las rotas principalas d'aicí a 2026. La poténcia deurà augmentar progressivament fins a 600 kW en 2028.
Pel carris pesucs (autocars, camions), d'estacions de recargas deuràn èsser disponiblas almens cada 120 km amb de poténcias compresas entre 1 400 kW e 2 800 kW.
D'estacions per se poder cargar en idrogèn son tanben previstas almens cada 200 km d'aicí a 2031 suls axes principals europèus.
Al nivèl de la tarificacion, los pagaments seràn facilitats e un abonament serà pas necessari. Demai los preses seran indicats en kWh, en kg o per minuta/session. Una basa de donada serà mesa en plaça per poder informar lo consumidor sus las possibilitats de recarga e los preses.
Per intrar en foncion aquesta nòva legislacion espèra l'accòrd del Conselh Europèu.