Sul 31 de març de 2012 la coordinacion Per la lenga occitana ! comunica :

Tolosa capitada !

Lo 31 de març de 2012 es estat una capitada bèla per la lenga occitana amb 30 000 personas per carrièras a Tolosa e per las lengas regionalas que recampèron mai de 65.000 manifestaires dins França tota per afortir lor dinamica e demandar per elas una lei e d’un estatut.

La Coordinacion "Per la lenga occitana !" se felicita de la mòstra bèla d'unitat de las lengas regionalas que faguèron la pròva de lor dubertura e que diversitat va plan amb convivéncia e unitat dins l'accion. Avèm mostrat que sèm indignats e que nòstra indignacion nos encamina cap a l’avenidor amb conviccion. Avèm capitat de botar en lutz la situacion juridica absurda d'aquel patrimòni de França (art 75-1 de la Constitucion) que se trapa sens estatut juridic e que far dependre las accions de far al benvoler d’un elegit o d’un foncionari !

Aquelas manifestacions an complit lor objectiu màger : far dintrar la question de las lengas regionalas dins lo debat de las eleccions presidencialas e legislativas.

Venguèron nos presentar sos engatjaments per la presidenciala :

  • lo President del Senat, segond personatge de l’Estat : Joan-Pèire Bel, per lo candidat Hollande.
  • la candidata Eva Joly en persona.
  • Joan Lassalle, per Bayrou, que faguèt sa presentacion en occitan.

Se son engatjats los tres a :

  • modificar la Constitucion
  • ratificar la Carta Europenca
  • fargar una lei per las lengas regionalas.

Mercejam las 30 000 personas que venguèron a Tolosa per faire avançar la lenga occitana tanplan coma las collectivitats que nos an ajudats, en particulièr la Comuna de Tolosa que facilitèt grandament aquela granda capitada.

Mercés de l'estrambòrd de totas e totes, sens doblidar la joinessa qu'es estada plan vista pels mèdias.

Ara l'accion contunha, que lo 31 de març es la debuta d'una dinamica comuna amb las autras lengas e culturas per obténer una lei.

Caminam plan e ganharem... après la lutz ua auta lutz !

Las associacions de la Coordinacion : IEO (Institut d'Estudis Occitans) - la confederacion Calandreta - OC-BI (parents de las classas bilingas del Servici Public) - Convergéncia Occitana - CREO : Centre Regional dels Ensenhaires d'Occitan de la Region Miegjorn-Pirenèus.

Abril de 2012