Una campanha de finançament participatiu se debanèt a la fin de l'estiu de 2019 per permetre la sortida del documentari Occitanie, la bataille oubliée.
L'organizator, Saga Film, posquèt remosar mai de 14 000 èuros sus KissKissBankBank. Son a trabalhar sul projècte.
Sinòpsi - 1219, prèp de Basièja, de cavalhièrs se meton en òrdre de batalha, prèst per la batalha. 2019, uèch sègles mai tard, dins aqueles prats esclafats pel solelh, d'unes reconstitutors s'aprestan a repetir lo meteis esplech guerrièr.
Entre commemoracion publica d'un eveniment istoric, reconstitucion del gèst e de la mentalitat medievala mercés a l'arqueologia experimentala e a las sciéncias umanas, e memòria populara que marquèt los esperits del país, cossí explicar aquel eveniment susprenent ?
Cossí percebèm lo nòstre passat, e cossí lo transmetèm al nòstre torn ?
Aquel documentari vòl propausar una immersion dins lo grand mond de la transmission istorica, dempuèi l'universitat fins a la vulgarizacion.
Ensajarà tanben, a l'escasença de la reconstitucion d'aquela batalha medievala, de comprene los enjòcs de la transmission e de la memòria modèrna.
Saga Films es una associacion qu'a per tòca de promòure l'istòria a travèrs l'audiovisual amb de filmes, de serias o de documentaris. L'idèa es de favorizar l'encontre dels mestièrs del cinèma e dels de l'istòria en metent en relacion los professionals d'aqueles dos domenis.
Per ne saupre mai [clicar]
