L'IEO d'Erau en collaboracion amb Ràdio Lengadòc publica regularament de bilhets risolièrs, sovent critic. En julhet de 2020 s'interessavan a las activitats de l'estiu e als cortègis d'artistas, plan sovent en residéncia, que las acompanhan.

Sortida de residéncia

Diga ! Es lèu la fèsta de Sant Clar, lo temps de las cigalas, e quand poja lo mercuri, de costuma, lo Felibritge de « febrilejar » dins de felibrejadas amb sos cortègis immudables, quand a la coa lanlèra e ribon-ribaina, fan treslusir sas cigalas d’aur o d’argent, ocasion d’airejar tanben las arnas de sos desguisaments naftalinizats e de sas dentèlas 1900. Los ancians son pas tristes, los joves tanpauc. Es tanben lo temps de las sortidas de residéncias e d’autras cigalas venon butar son sèga-sèga sus las plaças dels vilatges, presentar sas performàncias creativas dins de procèssuses avantgardistas que nos escapan plan sovent, en chucant quicòm mai que de saba de platana per s’encigalar.

Vòls que te diga ? Me sembla de los escotar, que de còps que i a, valdriá melhor los daissar embarrats dins sas residéncias aqueles artistas auto-proclamats e servar au fresc las tenèbras sornas de son engèni congreaire de trobar clus qu’es pas crestian de los daissar sus un empont, a se faire venir la set en tarabastejant, quand plòu de brasas a ferratasses... Lo problèma es, dins aqueles ostalses de creacion qu’i van totes coma cabras a la sal, de se los veire radicalizar entre eles, un pauc coma a Guantánamo, o çò pièger, pichonar ensems.

De tot biais que siagam rais de l’estèla felibrenca, joglars ensolelhats que fan levar lo vent negre o simples colhons de la luna, coma tu e ieu, i tornarem lèu en residéncia susvelhada, per cas de recidiva dau virus. Aquí la nòstra astrada.

E, òu, dins l’espèra, passa a l’ombra !

Enfin, es çò que ne dise ieu.

La guinhada de l’IEO34. E, rau !
Julhet de 2020


Musica : Aqueles

Aqueles

Al mes de març de 2020 lo jornal Roergàs Centre Presse presentava lo grop Aqueles.

Sèrgi Viaule : critica del libre de Miguel de Unamuno 'Sant Manuel lo bon, martir'

Al cors de l'estiu de 2020, IEO Edicions publiquèt dins la colleccion Flor envèrsa Sant Manuel lo Bon, martir de Miguel de Unamuno.

Croàcia passa a l'èuro e intra dins l'espaci Schengen

Membre de l'Union Europèa dempuèi 2013, Croàcia emplega dempuèi aqueste 1èr de genièr de 2023 l'èuro coma moneda. De pèças novèlas son donc intradas en circulacion.

Los romans de Cristian Chaumont

Los darrièrs romans de Christan Chaumont

Cristian Chaumont publiquèt son primièr libre en 2010 a IEO Edicions, un roman policièr d'un pauc mai de cent paginas que revolucionèt pas las letras occitanas mas qu'aviá alara lo merite de donar a la literatura nòstra un libre dins un genre un pauc delaissat : lo policièr.

Occitània en qualques mots

Detalh de la cobèrta 'L'Occitanie en 48 mots' d'Herve Terral

En 2014 sortissiá lo libre L'Occitanie en 48 mots d'Hervé Terral.