Un article de Christian-Pierre Bedel dins la revista Canta Grelh, numèro 106, decembre de 2015.

Los americans, lo Roergue e lo Felibrige

Per l'amassada de 2012 que se debanèt a Najac, d'unes membres del Grelh roergàs siaguèron recebuts al castèl de Corbièiras per Richard Williams e Marie. Aqueles Californians devenguts roergasses, per far rampèu als Roergasses devenguts californians, son membres del Grelh roergàs.

Richard fa partida de la Theodore Roosevelt association, que una de sas grands-maires èra la filha d'aqueste president dels Estats-Units d'America (1901-1909). L'editorial de l'estiu 2014 del jornal d'aquela societat es consacrat a un escambi epistolari entre Mistral e lo dich president. L'autor, William Telchin, es estat informat per un collèga universitari, Sèrgi Ricard, de l'existéncia d'una letra de Mistral, del 15 de decembre de 1904, per felicitar lo president de sa reeleccion. La letra èra acompanhada d'una medalha d'argent per Edith Roosevelt e de la novèla edicion de Mirèio.

Roosevelt li respondèt per lo mercejar a l'encòp pel libre e per la medalha, mas li precisèt que fasiá un vintenat dannadas qu'èra en possesion de Mirèio, mas que la novèla edicion dedicada seriá a la plaça d'onor dins sa librariá.

Desirèt la capitada a totes los felibres : "All success to you and your associates !"

Per el, lo desvolopament industrial es una realitat que cal pa mespresar, mas cal soscar tanben a preservar las valors imaterialas que son l'èime d'un pòble : "I only desire that they shall not make us forget that beside the nations body there is also the nations soul." Theodore Roosevelt aviá plan comprés lo sens de l'òbra del novèl Prèmi Nobèl de literatura. "E, se toumbon li Felibre / Toumbara nosto nacioun." La letra se tròba al Musèu Mistral de Malhanas.